食物嘅賣相好緊要，冇賣相有時真係見到都唔開胃！如果話畀你知以下幾款看似極度暗黑嘅料理其實都真係唔係咁難食，大家又有冇興趣去試吓？
1. 雪糕拉麵＠菊や
甜品加拉麵係咩味道，係咪好難以想像呢！位於東京北千住有間叫「菊や」嘅拉麵店就非常破格地將整個甜筒放上拉麵上面做toppings，未食過可能會以為呢個拉麵一定係終極暗黑料理，但試過嘅食客就多數都讚不絕口！點解？因為店主唔係是但求其將個雪糕放上個麵就算，為咗配合雪糕嘅味道同溫度特登將個拉麵變成凍盤，雪糕半溶喺湯底反而令湯汁多咗重牛奶味，食落更creamy。
除咗個雪糕拉麵，店內面仲提供多款超有爆點嘅拉麵，好似呢個「咖啡牛乳拉麵」，構思來自其中一位非常鍾意飲咖啡嘅常客，每次食完麵都要飲返罐咖啡先安樂，既然係咁，就諗不如索性將咖啡倒入湯底，就係咁造就咗一個咁另類嘅拉麵嘅誕生。
呢個朱古力湯底係咖啡牛乳拉麵嘅延伸構思，該位常客話可以將咖啡倒入湯底，同樣道理點解唔可以將朱古力加埋入去，令到碗麵有少少朱古力味，拉麵又唔會冇埞企，但係咪真係好食，就見仁見智喇。
菊や
地址：東京都足立区千住大川町１０-３
電話：03-3888-5032
2. 藍色咖喱飯＠国営ひたち海浜公園
呢個藍到發紫嘅咖喱飯係茨城縣國營常陸海濱公園園內可以食到嘅料理，公園主打面積達3公頃、佈滿450萬朵嘅粉蝶花海，每年一到咗4月呢度就會綻放一片迷人嘅紫藍色彩，吸引唔少人遠道而來。公園嘅粉蝶花海咁出名，餐廳當然要推出相關料理，所以就創造咗呢道顏色有少少嚇人嘅咖喱飯，望落係有少少得人驚，其實味道好正常。
唔食飯都可以食個粉蝶花雪糕抖返陣，顏色比起咖喱飯溫和得多。
咪以為呢個咖喱飯紅卜卜就一定好辣，咖喱嘅紅色其實係取自園內另一種好出名嘅植物「地膚」，比起粉蝶花咖喱飯呢個嘅接受度高好多。
国営ひたち海浜公園
地址：茨城県ひたちなか市馬渡字大沼605-4
電話：029-265-9001
官網：hitachikaihin.jp
3. 炸豬扒雪糕＠茶っきり娘
你冇睇錯，呢個真係有舊炸豬扒喺上面嘅雪糕！好多人都因為個賣相而好奇心爆發買返個試試，係唔係伏真係因人而異，因為有網友試過話冇咩特別兼唔難食，但亦有網友話食落一啲豬扒味都冇不特止，仲成陣粉味，一個要成差唔多一千円，有啲搵笨嘅感覺咁話喎～
除咗個炸豬扒雪糕，呢個雞翼雪糕都係茶っきり娘雪糕經典中嘅經典，由於雪糕嘅味道唔太特別，所以接受度比炸豬扒雪糕高得多，不過食食吓如果覺得好似咬到啲渣渣，唔使驚，係雞皮嚟，証明呢杯雪糕真係有雞翼嘅成份！
茶っきり娘
官網：www.cha-kiri.co.jp
4. 三青手卷＠丸八寿司
咁「健康」嘅手卷真係坊間少有，最頂癮嘅唔係入面嘅食材，而係個名！手卷嘅日文名叫「三ツ矢サイダ～」，唔好話學過吓日文嘅人睇唔出呢個係咩手卷，叫個日本人嚟睇一樣睇到一頭霧水。到手卷上枱，店主終於將迷團解開，原來係指手卷入面有3種野菜，日文嘅講法係「3つ野菜だ〜（mitsuyasaida）」同「三ツ矢サイダー」嘅讀音一模一樣，咁食字法，邊夠你玩！
呢個手卷叫「丹波哲郎」，又係一道食字之作……手卷只係插咗條凍嘅魚仔，店主話係凍咗嘅魚貝，即係「冷貝」，掹車邊同「霊界（reikai）」同音，難GAG凍到震！
註： 丹波哲郎為日本已故知名演員，曾涉足多部靈異作品。
丸八寿司 駅前店
地址：愛知県名古屋市中村区名駅4丁目21-5
電話：052-563-0608
【追加：網友都玩埋一份！？】
坊間嘅暗黑料理何其多，但睇睇吓竟然會覺得靚嘅又會有幾多個？好似呢位網友整嘅「地球章魚燒」，好似越睇越有feel！？
呢位網友好鍾意整唔同嘅藍色料理，不過好似唔係次次都咁成功，好似呢個麵包咁，睇落有啲似發咗霉……
資料來源：niusnews, 奇食の館
About Post Author
