日本人點睇「帶埋細路去居酒屋」?

日本人點睇「帶埋細路去居酒屋」?

居酒屋對香港遊客嚟講,可能只係可以又飲酒又食到一碟碟日本嘢嘅地方。但其實居酒屋文化喺日本絕對係一個屬於大人嘅世界!返工好攰嘅上班族放工就係去居酒屋happy,食煙飲酒兼大大聲吐苦水,有時喺居酒屋坐近啲都會聽到唔少隔離枱嘅花生㗎!

日本人點睇「帶埋細路去居酒屋」?

不過小編都曾經見過,有家長係會帶埋小朋友去居酒屋嘅。最近網上出現到底應唔應該帶小朋友去居酒屋嘅討論,不如一齊睇吓日本人點諗啦!

日本一個讀者群主要為媽媽嘅網站Happy Mama就做咗個網上調查,顯示66%嘅家長/讀者都反對帶埋小朋友去居酒屋

反對理由:居酒屋係大人嘅地方!

日本人點睇「帶埋細路去居酒屋」?

有唔少反對聲音都表示,居酒屋係屬於大人社交嘅地方,因此唔應該畀小朋友參與。「如果係用完主個室就話啫,但居酒屋入面好多人講嘅嘢都唔啱小朋友聽,而且如果因為小朋友存在而要有所避忌都唔係好合理。」

讀者們都話居酒屋始終係一個畀人飲酒吹水嘅地方,如果係一家大細嘅話應該去返啲連鎖家庭式餐廳!有啲人更加覺得帶埋小朋友去居酒屋係啲大人自私嘅行為添呀。唔單止多二手煙,而且飲醉酒嘅大人亦都可能構成小朋友嘅危險同帶嚟壞影響。

咁點解又會有成33%嘅人贊成呢?

贊成理由:因為我關心我嘅小朋友所以先會帶埋佢哋去!

日本人點睇「帶埋細路去居酒屋」?

有啲家長就話唔明點解唔可以帶小朋友去居酒屋,話就算家庭式餐廳一樣serve酒、亦一樣有人食煙。仲話最近嘅居酒屋比家庭式餐廳仲多種類嘢食可以俾小朋友食,話時代變大家應該改變下觀念。

日本人點睇「帶埋細路去居酒屋」?
▲小栗旬老婆、模特兒潮媽山田優亦曾被八卦雜誌拍到帶埋小朋友到居酒屋與好友西山茉希大搞「女子會」,結果被網民插爆。

至於中立嘅意見就話,父母應該有責任選擇帶小朋友去居酒屋嘅時間。仲話如果大家都嫌棄小朋友嘅存在,結果會加重少子化添!有啲來自鄉郊地方嘅人就話,明明自己出生嘅地方,喺居酒屋入面嘅大叔會好樂意同小朋友傾計,仲建立良好關係,所以話唔係個個大人都厭棄細路,其實係好睇個大人嘅心態~

咁到底支持同反對派有咩共通點呢?

日本人點睇「帶埋細路去居酒屋」?

就係要守好禮儀道德。即使係反對派都話只要父母們早少少帶小朋友去,唔好影響到佢哋放工之後輕鬆就得,有啲人仲話希望父母要記得畀子女早啲休息,唔好影響到佢哋發育成長!例如沖繩嘅話,9點後就唔俾中學生以下嘅細路入店㗎啦!今次嘅問卷大部份人都話8點前就得。

最後就係,希望父母其中一方係唔會點任何酒精飲品,好好睇住小朋友。當然啦,香港嘅小朋友去到日本都可能唔會知啲大人講緊乜,就唔需要擔心俾人教壞嘅~不過容易吸到二手煙就係真嘅,所以各位父母去旅行帶住小朋友嘅話不妨參考吓以上日本人嘅睇法喇。

來源:ハピママ