去廣島玩基本上一定會去宮島睇下鳥居同嚴島神社 ,話晒鳥居係世界文化遺產嚟㗎喎 !
但我發現宮島嘅商店街原來都好好行 , 除咗買手信之外仲有好多餐廳同小食可以掃街 , 真係食到頂住個肚走呀 HAHA
我地今次住嘅廣島格蘭王子大酒店(Grand Prince Hotel Hiroshima)有船可以去到宮島 , 超級方便 ! 一落去酒店大堂後嘅碼頭就可以上船啦 , 不過酒店嘅回程船班比較早 ~
依個就係我地今次住嘅酒店啦 , 好靚呀又係海邊渡假一流 !!
遲啲嘅Blog會同大家介紹多啲關於依間酒店嘅資料 , 等我呀~
準備宮島行啦 , 酒店碼頭人唔算多 , 大約一個鐘一班船去宮島~
但酒店嘅船票要￥3,300(來回) , 相對比坐JR同廣島電鐵貴
但因酒店地方比較遠 , 要坐巴士轉廣島電鐵或JR站再入宮島
時間就係金錢 , 所以我地揀咗最直接方便嘅交通方法啦~
酒店嘅船都特別靚喎 ~
船程大約15-20分鐘左右 , 位置仲任坐唔嬲添 (自由席)
話咁快就到咗宮島啦~
去睇鳥居同嚴島神社前 , 當然要行下商店街醫下肚餓同醫下我地嘅購物症啦 HAHA
由宮島碼頭行去商店街大約5-10分鐘左右 , 沿路仲有好多鹿仔路程一啲都唔悶㗎
行緊入商店街嘅時候見到一個烤牡蠣(蠔)超級多人 , 所以就打算跟大隊試下烤牡蠣啦~
就咁睇已經感受到啲牡蠣好新鮮 (每次睇返啲相都好想再去食)
最後買咗一份燒牡蠣￥400 同宮島鹿仔啤酒￥500
依個燒牡蠣真係超級鮮甜好爽口 , 完全唔需要加任何醬汁
另外宮島鹿仔啤酒似麥味嘅 , 我自已唔太鍾意飲啤酒都覺得幾易入口
食完燒牡蠣之後就揀咗間食鐵板牡蠣
佢有醬料可以選擇嘅 , 整個陣仲加咗好大塊牛油 (罪惡感超重)
一串￥400 , 佢有醬汁關係味道比較濃 , 啲蠔一樣好新鮮
但我地都係覺得燒蠔好味啲 ~ 超回味
行前少少見到有燒栗子~
睇佢咁大粒所以比佢吸引咗 , ￥680(細) 一份
但佢栗子比較乾身, 個人比較鍾意粉狀啲嘅口感 , 不過好香栗子味
栗子旁邊見到雪糕店幾吸引~ 雪糕啲漿全部都係天然水果蜜~
我地揀咗4號柚子蜜雪糕 ￥320, 但買之前誤以為似蜂蜜雪糕
店長仲比咗柚子蜜水我地試飲~ 好味
買咗兩種唔同味道嘅燒餅, 紫菜燒餅 ￥150 , 七味粉燒餅￥120
依個燒餅厚身但好硬有啲難咬 , 其實無咩特別 哈哈
不過吸引之處係新鮮整嘅燒餅 , 食個時仲有暖暖地嘅
女仔點會放棄食甜品呀 , 最後點都要食多次雪糕
因為貪多味道揀呀嘛 , ￥300 份量都幾多㗎
行商店街時候見到一大班中學生好開心
所以我地主動問佢地可唔可以合照 , 佢地真係超級熱情
同佢地影完相感覺自已都年輕咗呀
行完商店街當然去去鳥居同嚴島神社啦~
送兩張打卡必影嘅地標相啦 , 遲啲Xindy會同大家介紹鳥居同嚴島神社㗎~
唔知大家睇完啲食物有無流晒口水呢 ?
下個廣島Blog再同大家見!
About Post Author
