幽靜靚景又多嘢玩!島根溫泉酒店風之國

溫泉酒店風之國係位於由JR三江線川戸站坐巴士約25分鐘,或者JR山陰本線江津站駕車約35分鐘嘅地方。風之國有7個東京巨蛋咁大,對住山嘅美景非常舒服,而且地方非常幽靜,係一個可以俾你靜靜地休息散發日常疲勞嘅酒店~

全間酒店有16間房,有西式,日式或者係西日式合併嘅特別房,西式房仲會有幾間有閣樓,樓底夠哂高~風之國內嘅所有房間同餐廳,1樓,2樓都有免費wi-fi可以使用,好方便㗎~


溫泉方面,佢哋有個對住超靚湖景嘅溫泉,可以一邊浸住有「美肌之湯」之稱嘅溫泉水,一邊慢慢享受只有去風之國先可以欣賞到,令人身心舒暢嘅美景。風之國嘅溫泉除咗可以美肌之外,更可以舒緩身體各種痛症,例如筋肉痛,關節痛,仲可以疲勞回復同改善腰痛等等添!好適合帶返父母一齊浸㗎~

風之國內好多唔同設施同活動(注意需要收費),例如網球,BBQ(4~10月)。最推薦大家去嘅就係體驗工房,依到有各種用木同一種叫「石州勝地半紙」嘅和紙體驗(要預約),例如木製筷子,櫻花木枝製燈,木製玩具,和紙扇,和紙明信片等等。體驗活動之外工房內仲有現成嘅作品賣,老師佐佐木誠係櫻江勝地「石州勝地半紙」嘅唯一個正式繼承者,所有店內嘅作品都係老師親手,製作非常靚,連用和紙整嘅貓屋都有,好可愛㗎~酒店入面亦都會見到老師嘅作品添!想親手整和紙同木嘅作品,或者想買佐佐木誠老師嘅作品就記得要去風之工房啦!


 

去酒店住就緊係要食佢哋非常豪華嘅晚餐啦~風之國內嘅「レストラン風花」有多個使用紅喉魚,島根和牛,天婦羅嘅豪華套餐(食材會因季節而有所改變),份量十足又好食,嚟到記得要試下佢哋最自豪嘅海鮮同島根和牛先好走阿!

要留意返,風之國嘅星期五,六,假期前日,年末年始,黃金假期同夏季時間只接受一般預約(個人・少數人)而平日,星期日以及紅日就只接受16位以上嘅團體包場預約㗎咋!予約前記得確認清楚先呀!

 

另外佢哋仲有別墅「森之小舍」可以入住6人或10個人。入面設施完善,有廚房,沖涼房,洗手間,電視,更有哂所有寢具,煮食用具同食具等等。同一大班朋友嚟喺依個俾大自然入面玩夠哂舒服又寫意㗎!

 

温泉リゾート風の国

地址:島根県江津市桜江町長谷2696
一般Check in時間:15:00~
一般Check out時間:~10:00
(會因應住宿Plan而有所改變)
 

レストラン風花-かぜはな-

營業日:五・六・日・公眾假期・假期前日
※年末年始,黃金假期,夏季假期毎日營業
營業時間:
中午時段:11:00~14:30(LO 14:00)
晚上時段:17:00~21:00(LO 20:00)

詳細價格資料以及最新嘅預約狀況可以直接於官網查詢:按我
仲可以留意埋旅館的Facebook架:按我