【尋找合掌造之旅】高山、北陸地區周遊券

天氣轉涼啦!喺10月17號北海道仲落左今年日本嘅初雪,係咪好想即刻plan個日本雪體驗之旅,欣賞壯觀嘅雪景呢?今次為大家介紹高山、北陸地區周遊券,一條線由大阪,去白川鄉睇白雪覆蓋嘅合掌造,最後玩埋名古屋。

高山、北陸地區周遊券可以喺使用期限內無限次乘搭關西機場至金澤之間、名古屋至富山之間嘅JR自由席,以及金澤至富山之間嘅北陸新幹線自由席列車,大阪市內嘅JR列車都搭得。喺關西機場坐Haruka列車出大阪市區亦得,不過只可以坐自由席。

由大阪站去金澤站要成兩個幾鐘,坐自由席怕唔怕冇位要企咁耐?唔駛驚!呢張PASS有4次機會畀你訂座坐普通列車指定席,可以乘搭來往富山至名古屋嘅特急Wide View飛驒號、來往大阪至金澤嘅特急Thunderbird號,以及來往敦賀至金澤嘅Shirasagi號指定席。訂坐方法好簡單,只要到JR票務中心出示PASS預定即可。

留意番,呢張PASS唔可以訂坐Haruka同來往金澤至富山嘅北陸新幹線指定席,只可以坐呢啲列車嘅自由席,如果想坐要額外加錢。不過唔駛擔心,北陸新幹線唔FULL,有好多空位,唔怕冇位坐。

呢張PASS除左可以無限次使用以上所講嘅JR列車,仲包埋無限次乘搭來往金澤至白川鄉嘅濃飛巴士、北鐵巴士同來往新高崗至白川鄉嘅的加越能巴士。

要留意濃飛巴士同北陸巴士都比較多人搭,搭之前一定要預約,下圖有預約地點,詳細時刻表可睇番下面嘅高山、北陸地區周遊券官網。留意番,呢張PASS唔可以坐濃飛巴士由白川鄉去富山,最遠只可以去到金澤站,想去富山嘅朋友要喺金澤改坐北陸新幹線。

至於加越能世界遺產巴士就冇咁多人搭,唔駛預約,坐北陸新幹線到新高崗站,係站外嘅4號巴士站等車就可以,每日只有5班車會由新高崗站出發,可上周遊券官網查時刻表。如果想去同樣有合掌造嘅相倉就一定要搭世界遺產巴士,其他巴士去唔到嫁。

高山、北陸地區周遊券連續5日內有效,成人票價係14,000円(約970港元),小童係7,000円(約485港元),但要留意呢張周遊券係日本境內係冇得賣嫁,一定要係出發去日本之前到本地指定旅行社購買先得,所以確實售價要睇番旅行社嘅的匯率定價,大概會貴當日匯率少少。

舉例你由大阪玩到名古屋,行程如下:

  交通工具 車費(円)
關西去大阪 特急Hanuka 1,190
大阪去金澤 特急Thunderbird號 7,130
金澤去白川鄉 濃飛巴士 1,540
白川鄉去高山 濃飛巴士 1,540
高山去歧阜 特急飛驒號 4,420
歧阜去名古屋 特急飛驒號 1,220
  合計 17,040

逐次購買單程票(自由席)總共要17,040円,用呢張PASS未計大阪市內坐JR列車同去埋京都玩嘅車費就已經慳左3,040円,非常抵!

想買呢張PASS嘅朋友可以睇番以下網址搵旅行社(http://touristpass.jp/common/pdf/ASIA/china.pdf),部分旅行社只要去分店買就得,唔駛去到總公司買,好方便嫁!最好預早1-2個星期買,事關張PASS唔係即買即有,大概要等一星期先拎到手,買嘅時候記得帶埋Passport,旅行社職員要mark低個人資料先買到。

旅行社會出封換領信畀你,去到關西機場嘅JR票務中心出示PASSPORT同封信就換到張PASS,仲可以即時預約指定席。有左佢由大阪一路玩上去金澤、富山、白川鄉,再落番去歧阜同名古屋,調轉玩都得。

喺JR金澤站有出名嘅鼓門、兼六園同有個泳池嘅21世紀美術館

至於富山高岡市就係多啦A夢作者藤子·F·不二雄嘅故鄉,一出高岡車站就會見到12個多啦A夢嘅卡通銅像,遠少少就有高岡おとぎの森公園,一樣有多啦A夢同大雄佢哋,有時間不妨去睇下。

呢個PASS最正就係可以去埋白川鄉,冬天去白川鄉真係好正!

高山、北陸地區周遊券官網:http://touristpass.jp/zh-tw/takayama_hokuriku/