去奈良除咗一定要去同鹿仔打個招呼之外,記得仲要預留時間俾「東向商店街」!

 

「東向商店街」就位於近鐵奈良站旁,係去搵鹿仔同東大寺嘅必經之地,相信即使冇認真行過都一定曾經經過過,下次趕住去奈良公園前或同鹿仔玩完之後不妨留多少少時間,參觀一下商店街內特色店舖,品嚐隱沒街中嘅美食。

今次就由街頭直掃落街尾睇足12間店,當中食店唔算太多,可以輕輕鬆鬆食完一間之後買吓手信消化吓,再去第二間再食過,行完包你驚訝原來呢條商店街都有幾多野睇!

 

第一站 ➡︎「中谷堂」

「中谷堂」位於商店街入口旁邊,嚴格嚟講並唔算係商店街內嘅店舖,但一場嚟到當然唔可以唔試!店內最出名嘅就係大大粒嘅即製麻薯,好彩的話更加會見到工作人員即場用木槌揼麻糬。

 

打糕嘅過程超高速,睇吓工作人員嘅面部表情就知氣氛有幾緊張,少啲默契隨時會打中對方。

 

麻糬軟綿到幾乎揸都揸唔住,外皮竟然仲係暖暖地,入面嘅紅豆餡粒粒分明得嚟輕輕一咬就化開,唔怪得個個都爭住買。

中谷堂
地址:奈良県奈良市橋本町29
電話:0742-23-0141
營業時間:10:00~19:00
休息日:不定休
官網:www.nakatanidou.jp/

 

第二站 :柿葉壽司TANAKA 本舖

講到奈良最具代表性嘅食物一定唔少得柿葉壽司,而要講到歷史老店就一定係「TANAKA本舖」,開業已經超過150年,壽司用柿葉包住,食材主要醃製過嘅魚介,除咗可以拎走食之外,店內亦設有少量座位俾食客即場品嚐不同嘅原創料理,不過如果唔係好餓的話,可以買走帶埋去奈良公園搵個少鹿啲嘅地方望住靚景慢慢歎。

 

堂食menu選擇唔算多,勝在夠豐富。

 

柿葉壽司嘅味道比新鮮手握壽司味道較濃,如果真係想帶去奈良公園野餐,記得搵個冇咁多鹿仔嘅地方,因為佢地真係會搶食!

柿の葉すし本舗たなか なら本店
地址:奈良県奈良市東向中町5番地2
電話:0742-81-3651
營業時間:09:30~19:30
官網:www.kakinohasushi.co.jp/index.html

 

第三站:迴轉壽司 TOTOGIN

「TOTOGIN」於當地算係超人氣嘅迴轉壽司店,喺奈良同大阪一帶共設4間店舖,最大特色係食材由市場直送,件件都即叫即整,每碟¥120起有交易,食多幾碟都唔會肉痛!必試又厚肉又肥美嘅獅魚壽司,好味到連隻手指都想吞埋落肚!

 

「火炙味噌赤海老(¥450)」好大隻!經過輕輕火炙,無論係蝦定係米飯嘅香氣都變得更香又濃。

 

店內清一色全部都係counter位,望住師傅即叫即握,好新鮮。

ととぎん 近鉄奈良駅前店
地址:奈良県奈良市東向中町5-1 浅川ハーベストビル 1F
電話:0742-20-1010
營業時間:10:30~21:30
官網:www.totogin.com/

 

第四站:成城石井

無論去咩地方,小編總有鋪行超市癮,因為唔多唔少都實會搵到特別商品,好似呢間「成城可井」,雖然以售賣關東地方食品為主,但同時亦可以搵到來自30個不同國家產品,當中飲品嘅種類尤為豐富!想買手信呢度亦係個唔錯嘅選擇,納豆紫菜卷、日式菓子零食,店內通通都有。

 

呢個獨立包裝嘅「納豆紫菜卷」係手信必掃item之一!納豆味道唔會好重,咬咬吓仲會有少少漿口嘅感覺。

 

「Premium Cheese Cake」係店內人氣商品,軟綿綿嘅海綿蛋糕、包裹住杏仁片同提子乾嘅芝士層、香脆嘅奶油糖碎,每一層嘅口感都好分明,芝士味道夠濃得嚟整體味道唔會太甜,重點係可以常溫保存,即係話食過覺得好味的話,買返幾個返去做手信都仲得!

成城石井 近鉄奈良駅前店
地址:奈良県奈良市東向中町6奈良県経済倶楽部ビル1F
電話:0742-20-5610
營業時間:08:00~22:00
官網:www.seijoishii.co.jp

 

第五站:福泉堂

如果想一次過大手買入手信,咁就一家要嚟「福泉堂」,食得嘅唔食得嘅呢度全部都有,包括禮盒裝和菓子、和扇、招財貓擺設等等,啱哂唔想走嚟走去搵手信嘅你,慳埋慳埋啲時間又可以食多間!

 

不倒翁同招財貓擺設都好得意,有啲心郁想買返隻返屋企擺添。

 

奈良又點可以冇鹿仔公仔!送俾人好定送俾自己好呢?!

福泉堂
地址:奈良市東向中町25
電話:0742-22-5062
營業時間:9:00~19:00

 

第六站:奈良小鹿

如果想買更具奈良特色手信的話,可以去埋就喺福泉堂附近嘅「奈良小鹿」,雖然菓子嘅種類唔算非常特別,但大部份都印有鹿仔圖案,可愛到震!最受遊客歡迎嘅手信之選係一盒有3種唔同味道嘅「小鹿の里」,獨立包裝最啱用嚟分發俾唔同朋友。

 

「小鹿の里」一盒有齊柚子、抹茶、士多啤梨3款不同味道,小編最愛抹茶味嘅苦澀,完全冇和式甜品過甜嘅弊病。

奈良小鹿
地址:奈良市東向中町10-3
電話:0742-25-5188
營業時間:09:00~20:00
 

第七站:炸豬排 GANKO

「GANKO」喺關東同關西都有多間分店,主打熱辣辣嘅脆炸料理,又脆又juicy嘅炸豬排真係令人一試難忘,嚟咗咁多次日本都未試過的話一定要試!除咗炸豬排之外,店內亦有多款不同炸物,menu有中有英又有圖,唔識日文都唔怕唔識叫!

 

單單係豬排都有唔同部位可以揀,各有特色,要試又腍又多汁的話必點豬腰內肉「カツヒレ」!

とんかつ がんこ 奈良店
地址:奈良県奈良市東向中町19
電話:0742-25-4129
營業時間:11:00~22:00
官網:www.gankofood.co.jp/shop/detail/ton-nara/

 

第八站:DAISO

Daiso應該唔需要再多作介紹,明明知道無論係香港定日本都有極多分店,都梗係忍唔住要入去逛個圈!奈良店內產品極多,每個月會更新嘅item多達1,200項,冇理由唔入去兜返轉睇吓有咩日本限定掛!

 

奈良店都幾大幾好行,身邊有唔少朋友都鍾意掃定幾個購物袋方便回程打包行李。

DAISO
地址:奈良市東向中町17番地1-2
電話:0742-25-3620
營業時間:10:00~20:00
 

第九站:御好燒・明石燒 OKARU

如果朝早就嚟到商店街,可以考慮吓先嚟「OKARU」食返個即燒御好燒,因為開店之後瞬間就會坐滿人,唔早少少去隨時要排隊!店內每張枱都設有鐵板,店員會喺客人面前即席調料,聞到啲香味真係連口水都流埋出嚟。除咗御好燒係必試之外,明石燒都幾值得一試,蛋味夠濃郁。

 

超多料嘅御好燒!木魚碎自己想加幾多就幾多,食哂成個超滿足!

 

明石燒一客有8粒,每一粒入面都有大大粒章魚,食嘅時候要浸一浸附送嘅湯汁之後先食,口感軟綿綿,好味。

お好み焼・明石焼 おかる
地址:奈良県奈良市東向南町13
電話:0742-24-3686
營業時間:11:00~21:30

 

第十站:COTO MALL

咪睇「COTO MALL」門口細細,其實入面隱藏住多間店舖,可以話係一個小型商場。當中有女士們嚟到日本點都會一逛嘅藥妝店,仲有成條街難得一見嘅女裝店,同行有人話要買衫的話叫佢行返轉吧。

コトモール
地址:奈良市東向南町23-1
電話:0742-26-1515
營業時間:10:00~20:00
休息日:星期三不定休

 

第十一站:元喜神 奈良店

門口睇落勁有中國色彩嘅「元喜神」係一間主打雞白湯拉麵同沾麵嘅中華料理店,細心留意會發現每張枱都會有個小小嘅電爐,其實係俾食客親自製作雜炊嘅小道具,所以食完麵之後記得千祈唔好飲哂啲湯,將白飯同同蛋汁放入湯內,再放上電爐加熱,就會變成超入味雜炊,一個湯兩種食法,實在太好味啦!

 

「雞白湯拉麵」除咗湯頭好有雞味、叉燒夠嫩滑之外,最令人難忘嘅就係嗰兩粒自家製雞丸,口感鬆軟,吸滿湯汁嘅質感非常好食!

 

最後嘅雜炊簡直係一個perfect ending,食哂碗麵再KO埋碗飯,碎料~

つけめん・らーめん げんきしん
地址:奈良市東向南町26
電話:0742-26-1611
營業時間:11:00~22:00

 

第十二站:山崎屋 總店

又係不知不覺就會大出血嘅時侯!山崎屋創業已經超過100年,店內售賣多款奈良漬物,嚴選當造野菜以酒粕及味醂反覆醃製,奈良人最鍾意將漬物連埋酒粕放喺鰻魚飯上一齊食,入口先有漬物嘅味道,吞埋啖飯鰻魚嘅魚油香保仲會停留喺口入面,滋味令人回味再回味!店內有唔少漬物都可以試食,連西瓜漬都有,兜一圈就唔覺意拎多咗兩包,咁咪出事囉!

 

有好多漬物!連西瓜漬同蜜瓜漬都有!

 

一定要試嘅仲有呢個「奈良漬雪糕」,第一啖冇乜漬物嘅味道,但食多幾味就會食到漬物嘅微咸,意外地冇違和感之餘又幾好食喎。

山崎屋 本店
地址:奈良県奈良市東向南町5
電話:0742-22-8039
營業時間:09:00~21:00
官網:www.yamazakiya.jp/

 

最後附上各店位置圖,等大家去到唔使搵到頭昂昂~