【又係食士多啤梨嘅時節】日本綜藝節目推介 點樣嘅士多啤梨最好食?

近排士多啤梨當造,各地都有唔少相關嘅活動。就好似2月2號去到12號喺橫濱紅磚倉庫就有士多啤梨節比大家品嚐唔同品種嘅士多啤梨同相關產品,小編都好想飛去食呀!!!不過咁多士多啤梨,點先知邊啲係最甜呀⋯⋯今次我哋就整理咗日本偶像嵐唔同節目入面講嘅小貼士,幫大家挑選最好食嘅士多啤梨~

首先係揀士多啤梨嘅方法上,我地喺《相葉マナブ(相葉學)》同《嵐にしやがれ(交給嵐吧)》兩個節目入面綜合咗以下三大特徵:

  1. 蒂部翹起

    (截自《相葉學》,A:多水分 B:少水分)

    第一眼見到士多啤梨通常都會比佢紅當當嘅外表吸引,但原來上面毫不起眼嘅蒂部先係重點。《相葉學》嘅嘉賓、頂級水果店「銀座千疋屋」嘅採購部長石部一保先生就話好食嘅士多啤梨一定要水份均衡,即係連個蒂部都充滿水份。翹起嘅蒂部就係佢多水嘅證據,好似橋本環奈呢粒咁就正啦。


    (截自《交給嵐吧》,橋本嘅選擇:蒂部翹起嘅士多啤梨)

 

  1. 有好多尖端

    (截自《相葉學》)

    正常士多啤梨都係有啲似倒轉嘅水滴上寬下尖嘅,而嗰個尖端嘅部分就係士多啤梨最甜嘅部分。有多過一個尖端嘅話甜嘅部分就自然比較多!另外,通常多啲尖端嘅士多啤梨都比較大個,所以都要多啲時間先摘得落嚟,咁士多啤梨就有更多時間去成熟。不過太熟嘅士多啤梨反而會冇咁甜,所以要小心啲啊,唔係就會好似大野咁揀咗粒甜度低於正常值㗎啦。


    (截自《交給嵐吧》,大野嘅選擇:過份成熟嘅士多啤哩,被MC高橋茂雄(Savanna)吐槽話粒士多啤梨都冇曬張力)
     

  2. 由頭紅到落尾

    (截自《交給嵐吧》)

    好似上面咁講,士多啤梨成熟咗會比較好食,而佢由頭紅到落尾就係成熟嘅證據。士多啤梨生長緊嗰陣係由尖端開始慢慢紅上去,所以當佢成粒都紅曬嘅話就代表真係成粒都熟啦。留意返呢個小貼士唔適用於部份品種(例如白色草莓),不過大部份紅色嘅士多啤梨都適用嘅。


    (截自《相葉學》)

 

揀完粒好嘅士多啤梨之後,用啱方法食嘅話會令到佢更加好味㗎。

石部先生喺《相葉學》提供咗呢個方法:先沖一沖粒士多啤梨,抺乾後摘咗個蒂部先食。記住一定要最後先摘個蒂部,唔係啲水就會入咗粒士多啤梨度。抹乾佢都好重要,唔係粒士多啤梨就好易腐爛㗎啦。


(截自《相葉學》)

士多啤梨園「Erdbeeren」(士多啤梨嘅德文)嘅老闆田中幸男先生就喺《交給嵐吧》入面建議大家唔好由尖端開始食,而係摘咗蒂部後由頂部食起。因為尖端係成粒士多啤梨最甜美嘅部份,用呢個方法食嘅話就會越食越甜,為佢劃上完美嘅句號。

士多啤梨含有豐富嘅水分同鉀,有利尿作用,所以食完好多之後記得去趟洗手間呀。


(截自《交給嵐吧》,食得太多士多啤梨嘅話會發生令人困擾嘅事,就係好想去洗手間)

 

雖然士多啤梨真係一食就停唔到口,但如果萬一食剩點保存好呢?石部先生就教落,士多啤梨掂到水同冷氣都會好易腐爛,所以要用報紙包好、放入雪櫃保存蔬果嘅地方就得啦。當然,最好梗係襯佢仲新鮮嗰陣食曬去啦~


(截自《相葉學》)

順帶一提,其實由12用到5月都係士多啤梨當造嘅季節,通常四月啲士多啤梨仲平啲嘅?!慳家嘅大家等多陣先享受都未遲~


(截自《相葉學》,2016年東京都中央批發市場嘅統計情報中士多啤梨嘅平均批發價:12月份1公斤2092日圓、4月份1公斤949日圓)

 

最後,就等MJ教下大家點樣好型咁摘走士多啤梨嘅蒂部啦(以下截圖均截自《交給嵐吧》)


好似生田斗真咁用手?NOOOOO~


而係用飲管插喺士多啤梨嘅尖端度⋯⋯


一篤!搞掂!係咪好型呢!!!(爆笑)

 

希望呢篇整理可以令大家品嚐到更好食嘅士多啤梨,小編都在此祝福大家從此食親士多啤梨都係甜嘅~!

 

節目詳情

《相葉マナブ》(朝日電視台)
播放日期:2017年4月23日
播放時間:晚上6時正~6時半
主持、Support Member:相葉雅紀(嵐)、澤部佑(原市)、渡部建(UNJASH)
嘉賓:石部一保

《嵐にしやがれ》(日本電視台)
播放日期:2014年2月8日
播放時間:晚上10時正~10時54分
主持:嵐
嘉賓:片岡愛之助、半澤劇團、田中幸男

播放日期:2015年11月7日
播放時間:晚上10時正~10時54分
主持:嵐
嘉賓:生田斗真、伊勢谷友介

播放日期:2016年3月5日
播放時間:晚上10時正~10時54分
主持:嵐、高橋茂雄(Savanna)
嘉賓:橋本環奈、小瀧望(ジャニーズWEST)、及川光博