於科幻界中一個令人頗為惋惜嘅超新星：伊藤計劃，出道3年就因病去世，卻留低「2部半」足以成為「經典」嘅作品﹕『虐殺器官』、『和諧』，以及未完成嘅『屍者的帝國』。
伊藤計劃畢業後一邊正職做Web Director，另一方面繼續於Hatena Dairy寫科幻同電影評論，仲有嘅就係開始寫『虐殺器官』，不過呢部處女作已經幾乎「登頂」成功。『虐殺器官』除咗入成為當年小松左京賞最終候補外，更得到係科幻界出晒名嘅早川書房簽約出版，認真唔少野。
不過佢嘅作家生涯並唔長久，3年後嘅2009年佢就因肺癌去世，不過佢留低嘅作品就繼續喺科幻文學上發光發熱。好似同年就有『和諧』獲得第30回日本SF大賞，而翌年亦奪得費城科幻協會嘅菲利普·K·迪克紀念獎嘅「特別獎」。
而佢死時只有設定同30頁原稿嘅『屍者的帝國』，經圓城塔續筆成書後更加成功「登頂」，成功奪得有「東方雨果獎」之稱嘅「星雲賞」日本小說部門獎，而田中芳樹嘅『銀河英雄傳說』、神林長平『戰鬥妖精・雪風』同小松左京嘅『日本沈沒』都有得過獎。(小編有幸投過好幾次票，投咗最後又攞到獎嘅就只有日本小說部門嘅『屍者的帝國』，同電影·表演·多媒體部門嘅『猛烈宇宙海賊』、『D-9異形禁區』Orz)
銀河英雄傳說(動畫版圖片)
日本沈沒
既然係伊藤計劃嘅第一部作品，點解『虐殺器官』唔係最先上映？ 其實佢喺伊藤計劃作品動畫電影化計劃「Project Itoh」中係預定作為首部曲推出，不過製作公司Manglobe因為攪到一半破咗產，所以就俾另外兩部作品爬頭上映。其實嗰時仲有傳說『虐殺器官』將會「胎死腹中」添，好彩最後製作人山本幸治索性自己開間GENO STUDIO INC去接手，才令作品得以面世，令『虐殺器官』呢部伊藤計劃最初嘅小說同時成為最後嘅「動畫化」作品。
故事為免劇透小編就唔多講啦，總之就係「世界在撒拉熱窩發生核子炸彈恐怖襲擊之後，美國為了進行反恐控管，於是建構了徹底的資訊監控系統；另一方面，落後國家出現大規模的內戰與屠殺事件，全球逐漸陷入嚴重分裂。美國因此創立了全新的情報部隊，進行情報蒐集與戰爭犯罪者的暗殺。作為美軍情報部隊的王牌精英克拉維斯．薛帕德接受了美軍上層的命令——暗殺煽動各國內戰的戰爭罪犯「約翰．保羅」，在追查這些腥風血雨的同時，薛帕德也意外地得知「虐殺器官」的存在，因而開始找尋真相……」(係咪好似好熟面口？ 因為這是官方資料啊XD)
反而小編想喺大家入場前先「打打底」。如果你係一個「真‧科幻粉」，甚至係伊藤粉嘅話，請務必要入場觀看。因為喺3套電影版當中，『虐殺器官』係一套相對忠於完著嘅作品(話說『屍者的帝國』已經改到變咗另一樣東西)。
伊藤計劃嘅作品基本上都係好有反烏托邦嘅味道，而『虐殺器官』電影就更加冇對當中沉重嘅味道加上任何嘅掩飾。如果你平時對於『PSYCHO-PASS心靈判官』、『未來都市NO.6』甚至一些相對「傳統」嘅科幻作如『攻殼』、『亞基拉』等作品有興趣，比較喜愛訊息量較豐富同有內容嘅作品的話，『虐殺器官』應該是「必睇的」。
當然，如果你係喜歡刺激嘅戰爭與戰鬥場景，甚至係軍武粉的話，亦代表你不能錯過這個作品，因為劇中如抑制痛覺嘅痛覺遮斷技術、於視網膜上顯示戰鬥資訊嘅科技、情感調整、包覆著人工肌肉且，而且具識得動銷毀功能嘅侵入鞘等等都會令你耳目一新，而且戰鬥嘅場面非常迫真同寫實。而對比今日嘅恐怖襲擊形式、個人認證過度使用嘅社會狀況，你會非常佩服伊藤計劃當年寫呢本小說時係幾咁有前瞻性。
唯一需要注意嘅係，如果你入場睇電影只係想「輕輕鬆鬆、將腦放空」的話，觀賞呢部作品可能就會有點難度，一來故事比較沉重，二來作品訊息量比較一般動畫作品可以講係以倍數計，而伊藤最喜愛嘅就係大量加入人文、哲學甚至心理學辯證，連軍武等嘅設定都係仔細得令人吃驚，有種令人「我死都要將相關知識全部拋晒出嚟」嘅感覺，即使動畫化時已經簡化，仍然係會令人有「資訊爆炸」嘅感覺。
此外，小編係建議『虐殺器官』電影係最好連原著一併「服用」。因為電影為咗將故事都放進兩小時不足嘅放映時間內，其龐大嘅世界觀，故事同設定其實都有一定程度嘅簡化同取捨，所以對於冇睇過原著嘅朋友要掌握故事嘅世界觀可能就要留心啲啦。不過請放心，『虐殺器官』電影由頭到尾都係幾忠於原著的。
About Post Author
