講起大阪大家一定會諗到「黑門市場」,咁講到京都大家又會唔會第一時間諗起人稱京都廚房嘅「錦市場」?

 

錦市場已經有成400年歷史,係一條長達390米嘅商店街,商店街內有成近130間店舖售賣鰻魚、京野菜、乾物、菓子、壽司等不同食物,重點係大部份都可以試食,一條街就可以試盡京都各類特產!由於地理位置非常方便,錦滿天宮就喺附近之餘亦鄰近公共車站,所以除咗係本地京都人嘅「廚房」之外,仲係一直極愛各國旅客歡迎嘅覓食之地!

美食種類眾多,今次就同大家一齊尋找在地人都力推嘅12間店舖

 

必食之一:京丹波

第一次見到呢檔栗子真係會嚇一嚇,因為栗子嘅Size真係大得誇張,大粒嘅可以大到好似成個高爾夫球一樣!最重要係有樣之餘亦真係幾好食,甜甜地夠鬆軟,吃兩粒已經勁飽。

 

栗子唔同大細有唔同價錢,通常¥1,000至¥3,000有交易。

 

同店仲有黑豆俾大家試食。

 

點解呢度嘅栗子好似零舍好食?除咗用料靚之外即場高溫烤製亦令栗子香氣飄香四溢。

京丹波
地址:京都市中京区錦小路通麩屋町東入ル鍛冶屋町206
電話:075-212-0989
營業時間:10:00-18:00

 

必食之二:こんなもんじゃ

「こんなもんじゃ」係一間豆腐製品專門店,除咗有以嚴選大豆同淨水製作嘅豆腐之外,必試嘅就係以大量豆乳製作嘅豆乳冬甩、豆乳軟雪糕等豆乳甜品,當中嘅豆乳冬甩最為人氣,一日可以賣超過1萬個!

 

吸引唔少學生妹排隊嘅「豆乳冬甩」,豆香十足。

 

軟雪糕食得出幾有豆味,唔會太甜,最啱夏天整返支!

こんなもんじゃ
地址:京都市中京区錦小路通堺町北西角
電話:075-255-3231
營業時間:10:00-19:00

 

必食之三:SNOOPY茶屋 京都・錦

錦市場係SNOOPY茶屋嘅第3間分店,由兩層式嘅古老建築改建,一樓主要售賣和菓子手信禮盒及雪糕,同時亦可以買到京都・錦店限定嘅Snoopy精品;二樓為餐飲區,可以食到融入咗京都特色嘅卡通原創料理,造型非常可愛,可愛到影完一輪相都未必捨得食!

 

便當賣相非常精緻,用料豐富。

SNOOPY茶屋 京都・錦
地址:京都市中京区錦小路柳馬場西入中魚屋町480番地
電話:075-708-7174
營業時間:10:30~17:30
官網:www.snoopychaya.jp/

 

必食之四:三木鶏卵

「三木」係於昭和三年(1928)已經開店嘅玉子燒老店,主打加入咗以利尻昆布鰹魚節湯汁刨製而成玉子燒,有多款口味同3種大小可以選擇。店舖力推又軟又多汁嘅「だし巻 特上」,食過一次先知道玉子燒原來可以整到咁好食!

 

最頂層嘅就係「だし巻 特上」。

 

店內有大班師傅密密做冇停手,所以即使店內持續出現人龍,等候嘅時間都唔會太長。

三木鶏卵
地址:京都市中京区錦小路通富小路西入ル東魚屋町182
電話:075-221-1585
營業時間:09:00-18:00
官網:mikikeiran.com/

 

必食之五:打田漬物 東店/西店

呢間漬物店喺街頭同街尾都各設有分店,主要售賣良心無添加手作漬物,有多款不同食材同味道,設有試食,小心試試吓樣樣都想買。

 

店舖會因應季節推出不同漬物,好似呢個「千枚漬」就係春季限定商品。

打田漬物 東店
地址:京都市中京区錦小路通麩屋町西入ル
電話:075-251-1747
營業時間:09:00-18:00
休息日:星期三

打田漬物 西店
地址:京都市中京区錦小路通柳馬場西入ル
電話:075-221-5609
營業時間:09:00-18:00

 

必食之六:かき屋 錦・だいやす

嚟到市場又點可以唔食新鮮海鮮!喺「大安」就可以食到來自日本全國不同地方嘅新鮮生蠔,每一隻都係店家嚴選,品質高之餘保証新鮮又衛生。另外,店內亦有提供以京野菜炮製而成嘅料理同不同魚類料理,值得一試。

 

生蠔全部都係即叫即開。

 

來自北海道嘅生蠔,一睇個樣就知夠新鮮!

かき屋 錦・だいやす
地址:京都市中京区錦小路通高倉東入ル中魚屋町509
電話:075-221-0246
營業時間:12:00-20:00
休息日:星期三

 

必食之七:寺子屋本舗

想買手信可以嚟呢間菓子專門店,菓子100%以日本國產米製作,食落脆卜卜好有米香。店舖門外設有烤爐製作熱辣辣煎餅,有興趣的話不妨買返塊邊食邊逛。

 

海苔包住煎餅係最經典嘅味道。

 

可以邊行邊食嘅仲有呢個一次過可以食到4種味道嘅煎餅串。

寺子屋本舗
地址:京都市中京区錦小路通高倉東入ル中魚屋町510番地錦小路ビル1F
電話:075-223-1290
營業時間:10:00-18:00
官網:shop.telacoya.jp

 

必食之八:田邊屋商店

「田邊屋」創業於天保初年,到目前已經有180多年歷史。咪以店舖以乾貨為主就冇咩啱買,細心搵吓一定會搵到得意又實用嘅調味料,好似抹茶鹽同櫻花漬物,真係好想買返包!店內亦設有用餐區俾大家品嚐加入咗鰹魚製作嘅簡單料理,味道純樸無添加。

 

想即刻試吓店舖嘅鰹魚碎有幾好味?可以叫返碗鰹魚飯試試。

 

抹茶鹽¥500一樽,買嚟做手信都幾有特色。

田邊屋商店
地址:京都市中京区錦小路通高倉東入ル中魚屋町506
電話:075-221-1407
營業時間:09:00-18:00
休息日:星期日

 

必食之九:まるしげ

呢間店舖嘅零食種類非常豐富,大部份由工場直送,更加有店舖原創零食,當中就算唔買嚟做手信都要買嚟自己食嘅就一定係被稱為「會呼吸的朱古力」嘅呼吸チョコ,有一種令人忍唔住一粒接一粒不停食嘅魔力!

 

「會呼吸的朱古力」有幾種唔同味道,唔知點揀就索性買哂所有味!

まるしげ
地址:京都市中京区錦小路通堺町東入ル中魚屋町486-1
電話:075-213-0432
營業時間:09:00-19:00
官網:www.marushige.co.jp/

 

必食之十:鮮魚木村

「鮮魚木村」係由江戶時代已經創業嘅鮮魚商,上至米芝蓮星級食店都會用嘅魚類,下至一般家庭會用到嘅魚類都有!唔好以為魚檔冇野睇,呢度一樣有好野食,必試一串串嘅刺身串,造型夠哂有趣,唔點醬油食啱唔啱自己口味真係要試過至知。

 

一串串嘅刺身食起上嚟好方便,最緊要係唔貴,一串¥200起有交易。

鮮魚木村
地址:京都市中京区錦小路通柳馬場西入ル中魚屋町486
電話:075-221-1639
營業時間:08:30-18:00
休息日:星期日及公眾假期

 

必食之十一:中央米穀

去完鮮魚店唔爭在去埋米店,因為喺呢度可以食到以同店穀米整成嘅飯糰,飯糰有多種食材可以選擇,size又唔會太大,行完食個錦市場再食返件都仲得!

 

店舖好用心地用哂中美日文話俾你知飯糰嘅內餡有啲乜,唔識日文一樣可以買到心頭好。

中央米穀
地址:京都市中京区錦小路通柳馬場角
電話:075-221-2026
營業時間:09:30-18:00


必食之十二:汸臼庵

呢間「汸臼庵」嘅魚肉串有唔少網民力讚係錦市場入面最好食嘅熟食小食,熱辣辣又入味,有選擇困難症的話嚟呢度買野食真係會幾難搞,因為款式太多,款款都好吸引好想試!

 

章魚魚肉串真係會食到粒粒章魚口感。

 

芝士味道係店方力推之作,味道意外地夾!

汸臼庵
地址:京都市中京区錦小路通富小路東魚屋町188
電話:075-253-0803
營業時間:10:30-18:00
休息日:不定休
官網:www.houkyuuan.com

 

最後附上錦市場各店位置圖,熟悉吓位置,到時去到一擊即中!