每當到櫻花季節，外國遊客就嘭嘭聲咁湧晒入日本賞櫻，好鬼熱鬧～
不過有時見到佢地一啲唔文明或者奇異嘅舉動，
日本人都敢怒不敢言，但係心底入面就blacklist咗嗰個國家。
想開開心心賞花得嚟又唔失禮，十足地道日本人咁賞櫻？落足眼力睇啦～
今日我同VIVI嚟到吉祥寺嘅井之頭恩賜公園賞花，
一落車首先就衝去便利店買賞花三寶～
1就係墊啦～
基本上附近有得賞花嘅便利店，喺開花期間都一定有墊賣～
1-2個人用嘅size的話，百幾yen就買到㗎啦～
第2寶就係酒！！！
如果星期六日去賞花，多數啲攤檔都會有酒賣，但係就貴90yen以上…好唔抵！
如果係平日的話，大部分攤檔都唔會開，所以大家記住買定酒入去飲！
睇漫畫嗰陣，明明男女主角賞花個陣都係帶個茶杯去飲茶，
而原來現實中大家都係麻甩地飲啤酒…
嗯，日本人就是這樣賞花的！
第3寶就係團子啦！！！
一講起花見嘅食物，大家都會話「冇咗團子嘅花見就唔係花見」，
甚至日本有句說話叫做「花より団子」，
啫係話與其賞花不如食團子好過，同我地嘅「捨華求實」類似意思～
井之頭恩賜公園最大嘅特點就係有得撐船仔同踩水上單車，
所以去到我地都選擇玩完晒先坐底野餐～
撐船仔全部都係600至700yen，划艇可以划1個鐘，其他就係半個鐘～
如果有氣有力又唔怕大風唔怕曬，真心建議大家玩划艇（ローボート），
因為划到去啲櫻花隔離個陣真係好近同好靚！！
但係大家真係要聽話，唔好多手掂啲花啊～眼看手勿動！
玩完一輪，買埋啲章魚小丸子啊、炒麵啊、大阪燒、串燒等等賞花必食小吃，
就可以鋪張墊坐低慢慢邊賞花邊飲邊食啦～
記得記得，唔該千祈唔好踩到人地啲墊！
尤其是係著住鞋嗰陣！
有時隔離會問你要唔要一齊賞花，
大家想同日本人一齊賞花就唔好錯過依個機會啦～
想知道更多有關井之頭恩賜公園嘅資料可以禁依到～
交通：
JR中央線「吉祥寺」下車 徒歩5分
京王井の頭線「井の頭公園」下車 徒歩1分
About Post Author
