【中部機場】出名古屋市區全攻略

近年唔少人都鍾意冬天去白川鄉睇點燈，經名古屋去白川鄉相信係唔少人嘅首選，去名古屋旅行最方便一定係直飛中部新特麗亞國際機場，到步後又點出市區呢？呢篇就綜合咗出名古屋市等地嘅方法畀大家做參考。

名古屋鐵道（名鐵）機場線

名鐵高速特急μ-SKY

想最快出到名古屋市一定係坐名古屋鐵道高速特急μ-SKY，由機場到名鐵名古屋站只需要經

「神宮前」同「金山」兩個站，車程只需要約28分鐘，不過車票就最貴，要1,230円（約85港元），而且班次唔密，追車尾就要等20-35分鐘先再有第2班車。

大家要留意μ-SKY唔止去到名鐵名古屋站，之後仲會到犬山等近郊地區，想一落機就直接去呢啲地區，不妨選搭μ-SKY。

以犬山站為例，車費要1,700円，車程約55分鐘。

另外，由於名古屋站同時可以轉市內地鐵以及包括新幹線等各JR路線，如果目的地位於機場嘅公共交通工具去唔到嘅地方，先去名古屋站再轉車都係唔錯嘅選擇。

特急‧急行‧準急列車

如果想慳車費又唔太趕行程，可以選擇唔使加購「特別車輛券 μ 車票（360日元）」嘅其他名鐵列車，只需要870円就出到名古屋市。至於車程長短，就要視乎你搭嘅係邊種列車，事關普通區間列車到快速特急列車都會由中部國際空港站開出，相對等車時間就快好多，繁忙時間約一分鐘一班，而且停站多，揀返最近酒店嘅站落就OK，記得睇清楚邊種列車停目的地車站先好上喎！

另外，由於名古屋站同時可以轉市內地鐵以及包括新幹線等各JR路線，如果目的地位於機場公共交通工具去唔到嘅地方，先去名古屋站再轉車都係唔錯嘅選擇。

到達後直行就可以去到交通廣場，左邊就係名鐵中部機場站入口。

利木津巴士

如果你拎住好多行李而且係住榮同伏見，可以選擇搭利木津巴士，車費1,200円，車程大約48至88分鐘。搭呢架巴士最好係唔駛轉車就直接到達榮同伏見一帶，中途會於唔少出名嘅酒店落客，方便住喺呢頭嘅朋友。要留意嘅係巴士班次唔多，一個鐘只有一班。

去到交通廣場右轉，搭喺Family Mart右邊嘅升降機或者電梯落巴士站，再喺自動售票機買飛就得。

的士

如果你介意洗幾錢出市區，只想舒舒服服一落車就到酒店擺低行李，可以選擇的士。

以名古屋站為例，中型車車費要14,500円，車程約50分鐘。

想知唔同地方嘅車費，可以睇返機場的士收資表（http://www.centrair.jp/tch/resource/doc/taxi_fare_summary_chart_TCH.pdf）

出市區嘅的士站就喺Family Mart再直行少少，吸煙區隔離條電梯同升降機落去。

名古屋機場巴士（深夜清晨服務）

如果你深夜或者一早先落機都唔怕，可以搭深夜清晨機場巴士，喺7號車站上車，不過班次只有兩班，分別喺深夜00:40及清晨07:00開出，終點站係名古屋站西出口。成人車費1,500円，小童半價，上車畀現金就得，車程55分鐘。