¥980 食到 巨型 海鮮丼!? 識食一定係 天神 「魚助食堂」!

¥980食一個海鮮丼絕對唔係史上最平,但可以親自出手製作,想砌幾高就幾高,有得玩又有得食,係咪齋諗都想去試吓呢!

 

位於福岡天神嘅「魚助食堂」真係有得玩,揀選好大中細飯嘅Size,就可以出發將店內4款食材憑技術夾喺自己碗飯上面,鍾意食幾多完全自己話事。

 

嚟到門口一定唔會唔認得,因為大大個招牌已經印住當店名物。飯有3個size,價錢分別為¥980(細)、¥1,280(中)、¥1,480(大)。

 

店內有個牌寫住當日有咩小菜同剌身,不過全部都係日本,對唔識日文嘅人嚟講幫助不大。

 

呢間舖頭好有趣,用木鈕扣嚟取代紙製食券。

 

店內除咗魚生刺身之外仲會有自家製小菜,一般女仔的話可以揀最細碗嘅「並盛り」,留返多啲位試多啲唔同美食。由於店方有特別途徑直接由長浜魚市場直接購入新鮮魚介,所以嚟呢度每一日都可以食到新鮮食材,而食材有機會日日都唔同,曾經出現過嘅有黃條鰤、油甘魚、花鱸、鰹魚等等,以¥980就可以食到咁新鮮嘅刺身,真心抵食!

 

留意返每人限時45分鐘,只可以出去夾一次,但就冇限件數,不過緊記食幾多夾幾多,唔好做大嘥鬼,呢個牌寫到明食剩會罰¥1,000。

 

每日都會提供5~7款Side dish,都係每人只限攞一次。

 

基本上人人都會自行組合到以上豐富嘅海鮮丼定食,如果真係好鍾意食魚生的話可以夾多幾件!

 

魚生好新鮮,一定唔會將貨就價,¥980就可以食到真係大滿足!

 

加埋蔥花同醬油,簡直就係完美嘅魚生飯,呢個價可以食到咁高質,香港真係冇咩機會食到!

 

魚助食堂 福岡パルコ店
地址:福岡県福岡市中央区天神2-11-1 福岡パルコ B2F
電話:092-235-7435
營業時間:11:00~23:00
休息日:不定休
價錢:¥980~

 

資料來源:gnavi