60分鐘
01
Feb 16
17:27
博客

【廣島蠔60分鐘放題】$155狂食廣島蠔!好玩又好食!

一場嚟到廣島,冇理由唔試下啲廣島蠔㗎...如果唔係點同鄉親父老、叔伯兄弟交待呢? 只不過單單幾隻廣島蠔又點能夠滿足到我...所以今次去嘅係【燒蠔放題】!係咪聽到都覺得興奮呢!唔好以為廣島蠔加上放題就一定好貴,食足60分鐘都只係2300円,即係港幣$155左右咋!係咪平到笑出嚟? 喂喂喂...擔心平嘢就一定冇好嘢?放心喇...島田水產係一間已經超過三百年歷史嘅老字號,由江戶時期到依家,一直販賣廣島蠔,質量仲頂呱呱添,分別有新鮮生蠔同新鮮燒蠔兩種,諗好食咩之後,就可以坐係牡蠣小屋入面慢慢食。生蠔係逐隻計,15個2750円(約港幣$185),20個 3500円 (約港幣236)、30個 5000円(約港幣$337);而燒蠔放題就係2300円(約港幣$155),如果女仔食量唔多,或者純粹想試下味嘅朋友,可以揀買一公斤燒蠔(大約10個)  1100 円 (約港幣 $ 74),不過記得留意6月至9月係休漁期,計劃出發嘅朋友要注意喇!​ 店鋪名稱:島田水產 地址:廣島縣廿日市市宮島口西1丁目2-6   前往方法:「宮島口駅」步行約10分鐘 開放時間:10:00 - 19:00 暫停時間:16:00 - 17:00 休漁期:6月至9月島田水產靠近海邊,隔個海就係宮島,仲有位可以泊車添 燒蠔放題60分鐘2300円(約港幣$155),另外提提你,燒蠔係會收租爐嘅費用,一個爐係400円,可以幾個朋友share