雪虫
09
Nov 16
22:07
博客

【北海道白茫茫一片】原來呢啲唔係雪!?(°Д°)

    冬天去北海道當然係為咗玩雪而去!但你又知唔知喺正式步入寒冬之前,北海道漫天都會佈滿白色嘅小白點,呢啲並唔係雪,而係一種叫做「雪虫」嘅小昆虫。     由於通常喺佢地出現之後一個星期左右就會落初雪,所以日本人都會叫呢種昆虫做雪之精靈。個名改得好浪漫,不過佢地嘅出現都會為當地人帶來頗大困擾,因為佢地一出現就唔係一兩隻咁少,閒閒地都上百隻咁嚟,痴哂喺啲車同衫上面,畫面好震撼!     只要你定定唔郁咁企一陣,啲雪虫就會飛哂上嚟佈滿一身。如果係以單車代步就仲得人驚,唔小心擘大咗個口啲虫就會走哂入個口度,勁核突!   不過呢種雪虫好脆弱,只要佢啲白色毛毛甩咗或者輕輕一拍,佢地就會死亡,如果唔想整死佢地,輕輕將佢地吹走就得㗎啦~     雪虫一年只會出現一次,大概會出現20日左右,下次去北海道嗰陣如果天文台明明話冇雪落,但又見到好多白色小白點喺半空漂的話,恭喜你,你遇到雪之精靈啦~