老舖
27
Jan 17
21:19
博客

【超嶄新街頭美食!】3大必試「進化系可樂餅」!

可樂餅係小編去到日本必食嘅最愛小食之一,最愛入面熱到辣咀嘅餡料,常見嘅有免治肉同滑溜忌廉,不過今次帶得大家捐窿捐罅搵嘢食就當然唔會咁簡單!以下落嚟呢三間,就連日本人都食到咀舔舔!   1. 新口味可樂餅@All About My Croquette     「 All About My Croquette」喺2016年8月先開幕,但短短半年都未夠就已經成為該區超人氣嘅可樂餅專門店!點解?因為店內環境好舒服,八款常設可樂餅質素夠穩定,除咗有經典原味之外仲有墨汁、紅菜頭等坊間極少見嘅味道,自然吸引到好多年青人去幫襯啦!   呢度每次都唔會炸好多,所以櫃入面見到嘅可樂餅通常都係啱啱炸起,超熱辣辣!   成粒都紅卜卜係咪有啲得人驚呢!紅成咁完全因為呢個可樂餅加入咗紅菜頭去整,冇添加人造色素㗎!   如果肚餓的話呢個飯團可樂餅就啱哂喇!飯團事先溝咗菠菜,最中心嘅位置有少少可以牽絲嘅芝士,食兩件已經飽咗一半!  
03
Nov 16
22:10
博客

【必敗神級手信!】老舖超好味明太子即食產品

去日本買嚟買去都係買和菓子同零食做手信,真係收嗰個唔悶買嗰個買都買到厭。下次不如搞搞新意思,試吓日賣3千幾個嘅明太子吞拿魚罐頭同埋配咩都好食嘅唧唧裝明太子即食醬?又唔貴又好味,最啱買多兩支放埋喺公司,lunch可以隨時加料!        呢兩件產品估都估唔到竟然係出自已經有近70年歷史嘅老舖「FUKUYA」之手,包裝可愛討好不特止,連使用方法都非常新潮,可以即開即食,完全跟得上時代嘅步伐!     明太子吞拿魚罐頭開賣到而家只有短短年半,但就已經賣出咗超過2百萬罐,即係平均一個月賣到3千3百幾罐,好多人都話食一次就會上癮,唔怪得銷量咁好啦!好癲啊!   明太子吞拿魚風味(¥900)     辛口明太子吞拿魚風味(¥900)    
20
Jan 17
23:38
博客

【猜猜我是誰!?】名店老舖經典之作!

睇唔睇得出呢個係咩嚟㗎呢?高爾夫球?咁簡單就唔使叫大家估啦!   呢個其實係出自和菓子老舖「とらや」之手嘅產品,外形同高爾夫球似到十足十,就算行到埋一埋去睇,唔講真係唔係好睇得出佢係一個食得落肚仲幾好味嘅和菓子!唔好以為做型咁得意緊係最新產品,錯錯錯!呢個波原來已經有成90年歷史,推出嗰陣仲因為嶄新嘅造型而獲得一致好評添!     可以令人以為係真嘅高爾夫球,個包裝盒都功不可沒,除咗上面印咗幾個人仔喺度打緊波,個盒嘅用色同畫功都好懷舊,同我地一般見慣見熟嘅和菓子包裝有極大分別。     走到咁埋睇都會以為佢係一個高爾夫球全因上面嘅凹凸紋都做得好仔細,最令人震驚嘅係連大小同重量都做到乎合一個真嘅高爾夫球嘅規格,當做真波帶上場應該冇人會懷疑!     話明係食得嘅和菓子,緊係會好奇佢入面到底係咩樣!呢個叫做「最中」嘅日本傳統和菓子入面包住嘅係極度濃郁嘅極品紅豆蓉,只係咬一小啖,紅豆嘅甜香已經瞬間溶化喺舌尖,果然係出自老舖嘅實力之作!