正到痺
18
Oct 16
21:52
博客

【食乜好】5大東京必食正到痺布甸

日本啲布甸點解可以做到咁靚咁誘人,就連便利店嗰啲都好鬼好味,軟綿綿嘅口感、香濃嘅雞蛋香,一入口勁幸福嘅感覺,諗起又好想食啦......如果你同我一樣都勁鍾意食日本嘅布甸,快啲mark低下面呢5間,就算日頭冇時間食都一定要買返酒店慢慢歎,唔試真係一定會後悔!   1. TestaRossa Cafe     呢間Cafe嘅絲綢布甸勁出名,選用咗奶味較濃嘅牛奶同茨城産嘅新鮮雞蛋,加埋來自北海道嘅鮮忌廉,先可以做到個布甸嘅口感好似絲綢咁幼滑。一啖挖到底連埋帶有少少苦味嘅焦糖放入口,甜中帶苦,好味到一啖接一啖咁不停食,唔覺唔覺就好快食哂一樽......   舖頭入面嘅布甸已經好香濃好好味,呢個「Premium Silk」味道更濃,因為用咗2倍嘅雲呢拿豆去整,仲只係用蛋黃唔加蛋白,令到個布甸有勁香濃嘅雲呢拿味同雞蛋味!不過呢個布甸屬於期間限定,唔係咁易食到,所以見到有得買就千祈唔好錯過!   布甸一共有9種味,除咗原味而家有得食黑芝麻、焦糖、抹茶、草莓、芝士同咖啡,推介一定要食原味,咁先食得出個布甸原本嘅味道。