日本旅行
07
Nov 16
08:46
新聞

冬天去小樽運河睇小樽雪物語!

冬天去北海道又點可以唔去小樽睇浪漫運河景?   今年11月17日起至明年2月12日至,小樽運河將會舉行「小樽雪物語」活動,將會喺小樽運河點起藍色燈,營造浪漫氣氛。小樽著名嘅玻璃工房仲會親手製作玻璃酒杯塔,加上200個小燈飾,將會呈現非常靚同浪漫嘅景色。各位遊客唔好錯過喇!   點燈時間:日落起至晚上10點半 點燈範圍:小樽運河 淺草橋~中央橋(※中央橋因工程,將會於12月末後先開始點燈) 點燈式開幕禮:11月12日 4點半 小樽運河 淺草橋街園  
24
Nov 16
08:47
新聞

京都清水寺明年開始3年整修計劃 想睇靚景要快手!

每年從全球吸引550萬遊客到訪,就連香港旅客都好鍾意去嘅世界文化遺產、京都清水寺,最快將於明年春天起進行為期三年嘅整修計劃,預計將於2020年東京奧運前完成。想趁未有支架或布幕遮住本堂同舞台嘅時候去就真係要快手喇!   根據日本《朝日新聞》報導,該計畫將已本堂屋頂為重,到時著名嘅「清水舞台」四周將會被鐵棒支架包圍。整修期間雖然遊客仍然可以前往參拜通道,亦可以企喺清水舞台上邊,但最出名嘅「左邊京都街道、右邊清水舞台」嘅景色暫時都唔會再見到。今次整修係自1633年清水寺銷毀重建以嚟再次進行大規模整修。   資料來源:朝日新聞
22
Dec 16
11:26
博客

拉麵店老闆最唔想你做嘅四種行為

唔少香港人都係日本拉麵愛好者,而去到日本旅行食番碗地道嘅拉麵更加是常識吧!拉麵店有大有細、有出名嘅有隱世嘅,不過講到食拉麵嘅禮儀就相信係千篇一律。唔想成為日本拉麵店心目中嘅麻煩客人?睇下下面呢堆真正喺拉麵店工作嘅人揀選嘅「最唔想食客做嘅行為」,下次去日本食拉麵小心唔好犯呢~   1)掛住玩電話唔食麵   難得去旅行仲要食到好西,梗係相機食先即刻呃like啦!但係,有好多拉麵店老闆其實好唔鍾意呢個行為。受訪者嘅H店員就話:「其實相機食先唔係問題,影完即刻食都仲接受到...但影完仲喺度㩒電話就唔係幾好囉。」梗係啦!打完句caption、check埋個in、up完張相碗麵可能已經唔係最新鮮出爐嘅美味,同埋即刻品嚐都係對店家嘅尊重~其實caption都可以食完碗麵先打啫...   2)喺多人嘅時候要求連住坐 日本好多細嘅拉麵店可能得10至15個位以內,多數都係連住個counter。如果撞正多人排隊嘅黃金時間去食,3個人或以上想一齊排排坐食其實係會影響到店家嘅運作嘅。H店員話:「兩個人一齊坐就話姐,3個人或以上嘅話其實已經好難安排座位,而且要等空位嘅時候排後面嘅客人又冇得食,呢個問題都幾頭痛。」所以大家如果唔介意,喺多人排隊嘅時候不如做下心理準備,即使分開咗食都唔緊要啦~(反正店家都唔會想你留低食完坐好耐 T_T)