主題cafe
10
Jun 16
19:46
博客

【期間限定至22/6】Tower Records X IQ博士主題Cafe 極速食評!

「靈感IQ稱得上,十分之高超~」拿!除非你扮後生或者無童年,否則如果你係80後90後,你唔會唔知我唱緊咩嘅!漫畫家鳥山明先生嘅大作,除咗有龍珠之外仲有深受香港人歡迎嘅IQ博士。細細聲講,其實細個阿媽唔係好畀我睇架咋,因為小雲成日玩屎。但邊個又估到20年後嘅今日,我竟然可以嚟到日本東京同小雲一齊玩屎呢?   今日同大家介紹只係限定一個月嘅Tower Records表參道Cafe同IQ博士合作搞嘅主題cafe!喺正表參道大街,隔離仲要係KIDDY LAND等名店,大家行街行到攰都可以黎坐下喎!呢個主題cafe其實係慶祝IQ博士動畫係日本放送35週年紀念(WOW!)6月22日就無架喇~   我突登避開lunch人潮高峰,平日下晝一個人嚟食都有位唔使等。一出lift就見到一排小雲做封面嘅IQ博士漫畫喇!   店內都當然增添咗小雲同小吉嘅擺設。仲有天神村村民嘅相做背景,就連店員都打扮成小雲咁,好得意。 而且一路播住日文版嘅IQ博士歌曲,懷舊得黎好有feel~店內仲有賣特別版CD添!