身為Johnny’s 事務所少數已結婚藝人之一、44歲樂隊TOKIO嘅成員山口達也今日宣布同前模特兒妻子正式離婚。兩人係2008年3月結婚，結婚當晚山口達也仲係日本武道館嘅演唱會上面當著1萬3000人粉絲面前突然宣佈已結婚，哄動一時添！
▲佢嘅前妻高沢悠子係仙台出身嘅模特兒，結婚前已經拍咗8年拖，兩人現時育有兩名兒子。熱愛衝浪嘅山口達也居住於鐮倉，亦都係出名嘅好爸爸。佢經常喺節目到透露閒時會同仔仔睇超人show，仲會整埋便當俾仔仔食添！
▲前排山口達也帶著眼罩喺佢有份主持嘅晨間新聞節目中亮相，臉上充滿傷痕。佢本人就聲稱係騎單車出意外受傷，但傳媒就覺得好可疑。加上短期內嘅今日宣布離婚，令更多嘅日本人猜測戴眼罩同面部受傷會唔會係另有原因。
▲更加有網民將佢帶眼罩嘅樣同真三國無雙嘅夏侯惇作出比較。
▲頭先山口達也已經係日本召開記者會交代事件，今次唔單止係尊尼事務所首例，佢仲親自目送蒞臨嘅記者離開會場，令人十分佩服呢位明星貼地同溫柔嘅舉動。
▲記者會中佢承認係老婆三年前已經希望離婚，因為佢工作同私生活嘅schedule令佢老婆感到有壓力。平日繁忙嘅藝能活動令佢一個星期得兩三日可以返屋企、加上佢周末又熱愛戶外活動，鍾意去田區體驗農務、去海邊滑浪，令到妻子覺得不能消受。今次嘅決定係無任何婚外情嘅關係，亦都係兩人冷靜決定嘅結果。前妻仲話今次唔係因為嗌交而離婚所以唔會收取任何贍養費。山口早幾日已經親自通知TOKIO其他成員，佢之後都會喺前妻同小朋友距離5分鐘嘅地方居住。
今次記者會佢一句關於前妻嘅壞話都冇講，仲好幫住前妻希望大家唔好誤會。佢仲話今次反映自己未夠成熟，因為優先自己想做嘅嘢令到佢未能帶備妻子所需要嘅安全感。不過始終一齊咗16年，睇落兩人仍然會保持友好關係。記者會開始前，前妻亦有打電話問山口「大丈夫？」佢亦都話前妻係小朋友面前都叫呢個好爸爸做英雄。至於兩個小朋友以後就會跟媽媽住。
好多網民睇完都話睇得出佢字裡行間真係好愛護屋企人同前妻，而且覺得山口親自交代事件真係好認真同好男人。佢亦都澄清今次事件同帶眼帶係無關架。
About Post Author
