【食乜好】去「築地秋祭2016」食好西!

【食乜好】去「築地秋祭2016」食好西!

今年嘅「築地秋祭2016」同往年一樣,都會喺10月8日同9日呢兩日進行,集結中央區及築地場外市場多間名店,等你可以一次過食盡不同美食!
 
留意返,星期六開朝早9點到下午4點,星期日會收早一個鐘。
 
根據往年嘅經驗,入場人次會多達5萬人,所以去食好西嘅話大家都要做定少少心理準備。
 
今年嘅主題係「佐酒小食名店大集合」,所以到時場內會搵到好多名店都會提供唔同嘅美味佐酒小食。
 
除咗佐酒小食,嚟到呢度緊係唔少得勁新鮮好味嘅海鮮丼飯啦!
 
推介大家去試吓呢間已經有250年歷史嘅「玉ひで」,當中嘅親子丼食譜及烹調方法係由250年前一代一代咁傳落嚟,極之傳統。
 
而呢間拉麵店「篝」又係每日都排到成行成市,因為佢地嘅湯底好特別,濃縮咗雞嘅精華,配合幼身麵條,每一啖都吸滿湯汁,好正。
 
除咗以上店舖之外,「小春軒」、「泰興楼」、「つきぢ松露」等等多間名店都會出現喺呢個祭典,真係好令人期待啊!!
 
 
仲有,唔單止淨係食,喺呢兩日大家仲可以參加「体験食育教室」,會有師傅教你點整玉子燒同點劏魚,係咪好吸引呢!
 
============
築地秋祭り2016
舉行日期:2016年10月8日(星期六)~9日(星期日)
時間:8日(星期六)09:00~16:00/9日(星期日)09:00~15:00
場所:築地場外市場、市場橋公園特設會場