電音天團Perfume首次主演日劇 「喺我哋一生嘅寶物!」

電音天團Perfume首次主演日劇 「喺我哋一生嘅寶物!」

人氣電音組合Perfume唱歌跳舞犀利就大家都知,估唔到嚟緊3月尾4月頭佢哋將會演出日劇,仲飾演三個由細識到大嘅好朋友。編劇為知名日劇《野豬大改造》嘅劇本家木皿泉擔當,套劇嘅名就叫《三色堇》(パンセ),將會預3月31日及4月1日連續兩晚於東京電視台播出。

電音天團Perfume首次主演日劇 「喺我哋一生嘅寶物!」

劇情圍繞飾演OL嘅あ~ちゃん(西脇綾香)、幫屋企工作嘅かしゆか(樫野有香)、及冇固定工作嘅のっち(大本彩乃)三位女生因小學返屋企路線一樣所以自細成為好朋友。佢哋愛追求非現實嘅嘢,夢想可以一齊買間洋樓一齊住~咁啱俾佢哋搵到超級筍盤,點知入住呢間洋房原來有個條件,就係要照顧「力丸」。當三人以為力丸係一隻狗,爽快答應後搬入新居當天先發現力丸竟然係一個足不出戶嘅中年男人!到底呢件事會令三人關係產生乜嘢變化呢?

睇完個故事大鋼淨係好好奇到底會由邊個出現呢個中年男子呀~應該唔會又係呀源哥掛XD

あ~ちゃん就話:「我哋Perfume17年嚟淨係唱歌,所以東京電視台搵我哋拍劇我哋真係覺得佢哋好奇怪啊(笑)。不過劇本實在太有趣同不可思議,而且仲睇得出人物設定都係為我哋而設,相信會令人產生「如果我哋唔係Perfume嘅話…」嘅諗法!」

電音天團Perfume首次主演日劇 「喺我哋一生嘅寶物!」
▲Perfume為今季人氣日劇《東京白日夢女》唱主題曲「Tokyo Girl」,而あ~ちゃん更加為劇中小精靈配音,淨係聽聲都聽得出其實あ~ちゃん幾有演戲天份啊~

かしゆか亦表示首次主演連續劇真係好緊張,但因為唔覺得以後會再有呢啲機會所以即使不安都想挑戰!のっち亦都話本來三人都非常懊惱應唔應該接拍,不過怕咁幸福嘅機會唔會再有第二次,所以決定一齊拍,仲話係佢哋「誕生嘅密語」、「一生嘅寶物」喎!睇嚟各位fans真係唔好錯過三位女神級偶像咁精彩嘅演出喇!

資料來源:Natalie東京電視台官方網站