遊客喊住食辣辣壽司 大阪壽司店涉歧視外國食客

遊客喊住食辣辣壽司 大阪壽司店涉歧視外國食客

大阪難波一間深受遊客歡迎嘅壽司名店發生針對遊客落重手、於壽司狂加芥末事件。事源今年9月尾至10月頭,於Twitter及Google均出現指證位於難波嘅「市場ずし難波店」會針對遊客提供加入大量wasabi嘅壽司嘅證供。當大家都懷疑緊事件嘅真假之時,經營壽司店嘅藤井食品於官方網站發表道歉聲明,承認的確有員工為食客提供加料壽司,不過就網民懷疑壽司店嘅做法係咪歧視外國人一事,壽司店就話未能確認員工嘅行為舉動有冇呢個意思。
 
壽司店負責人聲稱,因為好多外國食客嚟食壽司都會係咁講「wasabi,wasabi」,所以壽司師傅就覺得外國人口味係鐘意食多啲wasabi嘅壽司,所以先向外國食客提供加料壽司。當然有網民唔接受呢個解釋,覺得壽司店只係喺度狡辯。
 
有日本人食客A子小姐之前帶韓國籍男友去幫襯壽司店時,表示感受到壽司店裡面都係熟客比較多,令首次幫襯嘅佢哋咁都有少少唔自在。雖然男朋友能夠講日文,不過發音未算標準,店員聽口音就猜測到佢男朋友唔係日本人。如是者,佢哋點嘅魷魚、鯛魚、金槍魚壽司等都被放入大量芥末。A子小姐表示佢同男友平時都好少去呢種專門店食壽司,但見其他食客完全冇問題,自己就食到喊晒口,唯有啞忍,同男朋友一邊流淚一邊苦吞壽司。幫兩位握壽司嘅係同一個店員。
 
A子小姐投訴道歉聲明話未能確實有冇店員發出歧視言論,但無可否認今次嘅行動已經有歧視食客嘅成份。而且道歉聲明得日文,根本唔算對外國遊客道歉、無誠意。小編見到連Google嘅食評都有外國遊客留言話受到不公平對待,睇嚟如果壽司店真係想繼續做生意都應該清清楚楚交代事件先得啦。
 
新聞圖片來自:mbs.jp