【退稅新制度】5月起買夠5000円即可退稅!?

【退稅新制度】5月起買夠5000円即可退稅!?

大家去日本shopping最緊張嘅其中一樣野當然唔少得退稅啦!事關退完稅嘅感覺就係拎番D比左出去嘅錢,就好似又多左錢咁啦哈哈!(係呀我夠知係自欺欺人吹咩)
咁話說日本將會喺黎緊5月1號推出新退稅措施,方便外國遊客,而呢D新制度我認為真係幾荀幾吸引嫁!咁即係有咩措施呢?
 
1.不止藥妝,其他非消耗品買滿5000円均可退稅!
 
以往shopping買藥妝到5000円就可以退稅,但其他貨品,好似衫褲鞋襪就要成10000円先可以退,作為窮L甚少會買到10000円野(應該話好少會同一間鋪買超過10000円),所以好多時都無得退,搞到嬲嬲豬。但而家就唔同啦!!!因為只要係喺Japan Tax-Free嘅店鋪買野,不論係衫褲(非消耗品)定藥妝(消耗品),只要買夠5000円(未稅金額)就可以辦退稅啦!對於鍾意到到都買D野嘅我黎講真係天大嘅好消息!
 
要注意嘅係,辦理免稅時要簽一份購入誓約書,表示30日內會將退稅商品帶離日本,所以如果你去超過一個月,就可能盡量計好日子走之前先買。
 
2.單一退稅系統
 
呢個係咩呢?單一退稅系統嘅意思係,如果你一日內喺不同鋪頭買野(當然要係Japan Tax-Free嘅店鋪),而只要佢地係位於同一個商店街/購物中心/outlet裡面,你嘅消費額加埋超過5000円的話都可以去一個類似免稅窗口嘅地方到退稅,唔再限於同一間鋪頭,仲可以唔洗行黎行去搞退稅,一次過就搞店。超級方便呀!不過要注意唔係全部商店街/購物中心/outlet都己經有呢個系統,買之前記得睇清楚,不過相信日後會愈來愈多商店街/購物中心/outlet加入嫁啦!
 
3.郵寄免稅品程序簡單化
 
如果遊客想將免稅品寄到海外或者機場,5月1號開始就唔需要再填寫購買紀錄,只係需要出示護照同埋填寫運送契約書就已經可以辦理啦!
 
4.退稅手續電子化
以往賣家係要喺客人退稅後,保留一張購入者誓約書7年咁耐,但而家就會將佢電子化左,用黎儲存紀錄。呢個雖然唔太關遊客事,但對於店家黎講絕對方便左好多呀!