相信Long D緊或者試過Long D嘅人都會知道遠距離戀愛係有幾辛苦，幾掛住你心愛嘅另一半。雖然而家科技先進可以進行即時視訊通話等，都叫做有得望下個樣，但就始終欠缺一份溫暖。
為咗再拉近啲遠距離戀愛情侶嘅距離，兩位分別來自關西大學同埼玉科技大學嘅研究生及助理教授西口昇吾同森沢幸博，連同佢哋叫Imagineering Lab嘅團隊就開發咗呢個叫「Kissenger」嘅電話「咀咀神器」。
用途同用法就唔多講，相信大家睇相都會明。呢個矽膠製嘅模擬嘴唇下面有晒sensor可以感測你嘅吻嘅位置同力度，即時傳送返畀同你傾緊電話嘅對象度，即係只有對方都係帶住呢個「咀咀神器」，佢就可以感受同你即時錫錫嘅感覺，唔駛聽聲再FF～！（但如果係咁好似冇得試傳送「巴黎鐵塔反轉再反轉」喎）
如果冇創意，呢個世界嘅科技發展將會變得好慢同無新意。所以我係好欣賞呢隊團隊做出咁有趣咁創新嘅發明嘅XD 不過我覺得最好笑嘅係，官網寫明呢個商品係設計畀情侶、屋企人、同粉絲嘅。點解係粉絲？佢哋話呢個Kissenger可以連接偶像同世界各地嘅粉絲喎～但我只係想像下已經覺得好驚，個畫面好似犯罪咁xD 你話偶像畀fan service 送吻畀粉絲就話啫～如果仲要收到粉絲唔同熱度同力度嘅吻…嗚嗚媽呀好驚呀！
資料來源：Kissenger
About Post Author
