石原聰美有機會與山下智久年內「30歲電擊結婚」!?

石原聰美有機會與山下智久年內「30歲電擊結婚」!?

上次同大家報導咗石原聰美同山下智久傳出同居「超認真交往家居密會」,今次就有《日刊大眾》報導石原聰美有機會於今年12月24日嘅30歲生日同山下智久電擊結婚喎!係真唔係呀!?
 
睇真啲個報導,就話山下智久雖屬於對旗下藝人結婚、交往超嚴謹嘅J家事務所,但由於最近SMAP解散騷動爆發,而山下智久同屬SMAP嘅前經理人飯島(詳情:SMAP解散騷動),所以如果唔畀佢結婚,佢有機會跟SMAP一齊離開J家!加上佢自從同石原拍完戲之後都冇再有新嘅電視劇作品,所以而家簡直係趁事務所立立亂嘅時候準備結婚嘅好時機!
 
不過,有電視臺相關人員就指出山下智久曾經同Johnny桑宣誓忠誠話唔會有任何獨立發展意向,所以就覺得佢唔會選擇結婚住。反而係,因為石原前排上綜藝節目話自己30歲前想做啲咩嘅時候,因為佢講話自己最近都開始咗學習看護嘅工作,令人猜測佢係咪已經鋪定後路如果人氣滑落可以有啲細藝。話說2010年佢被爆與電影攝影師同居,令工作減至得返一個波子機嘅廣告。到底而家紅透半邊天嘅佢係咪真係捨得為愛情放棄事業?
 
其實並非史無前例,同石原同一間事務所嘅大前輩山口百惠同樣曾經於人氣絕頂之時宣布引退娛樂圈。而石原就曾經主演過山口百惠嘅經典人氣日劇嘅翻拍版。到底會唔會步大前輩嘅後塵呢?講真,我就唔認為會,不過世事無絕對。各位粉絲唯有俾定心理準備啦。
 
 
資料來源:日刊大眾