【滴漏咖啡飯係咩玩法?】日清話你聽咖喱飯原來可以咁食!

【滴漏咖啡飯係咩玩法?】日清話你聽咖喱飯原來可以咁食!

 
你冇睇錯,我冇寫錯,日清11月2日真係喺渋谷站入面開咗間期間限定嘅即食咖喱飯店「DRIP CURRYMESHI TOKYO」,用滴漏嘅方法將湯汁加到飯入面!食個即食咖喱飯都搞咁多野,原來真係唔係單單為咗玩花臣搞Gimmick咁簡單,用滴漏嘅方法真係比就咁倒啲水入去沖好味好多!
 
 
呢間店預計只會開半年左右,計一計,即係開到2017年5月頭,要去真係要趁早!
 
 
店入面總共有3種咖喱飯可以揀,有Beef、Seafood同Spicy Chicken,揀好想要邊款飯就可以揀埋要邊款湯喇。
 
每種飯都有5款湯可以揀,啲味道平時都幾少機會食到,好似咖啡咁,邊個會諗到可以加落咖喱飯度食?!
 
牛肉咖喱飯:唐辛子、香蒜、茉莉花茶、鰹魚乾、咖啡
辣雞咖喱飯:唐辛子、香蒜、茉莉花茶、楓糖、咖啡
海鮮咖喱飯:唐辛子、香蒜、茉莉花茶、鰹魚乾、蘋果紅茶
 
 
揀好要咩湯之後,工作人員就會用滴漏嘅方法製作湯汁精華,佢地會將湯汁原材料放入滴漏杯入面加滾水,等每一滴湯汁可以慢慢滴落個咖喱飯入面,畀啲飯吸盡每滴精華。店員話牛肉x香蒜、海鮮x鰹魚乾、辣雞x楓糖係好味推介,唔知揀咩好的話可以參考吓~
 
 
最多人揀應該係呢個最大路嘅鰹魚乾,工作人員一啲都唔手軟,落咗勁多鰹魚乾落個滴漏杯度!
 
 
加水同等啲湯滴哂落個飯度全程大概5分鐘倒,比想像中快,唔知自已喺屋企整做唔做到一樣咁好味呢?
 
 
有得食啦!睇個樣就知佢好食啦!一入口有酸酸地嘅蕃茄味同洋蔥嘅香甜,加埋鰹魚乾特有嘅香氣,呢個飯真係有出面咖哩飯專門店水準,好有驚喜啊!
 
不過呢個飯同日清杯麵同樣都有一個通病,就係太細份啦,食完冇咩飽肚感,仲好似越食越餓......
 
DRIP CURRYMESHI TOKYO
地點:JR渋谷駅 山手線内回りホーム
營業時間:10:00~22:00 (L.O. 21:30)