好消息?大阪北梅田至南海なんば及JR難波之新路線終於行前多一歩

好消息?大阪北梅田至南海なんば及JR難波之新路線終於行前多一歩

好消息?大阪北梅田至南海なんば及JR難波之新路線終於行前多一歩。
 
新線名為なにわ筋線(車長會叫做難波筋線,因為向南係連接JR難波站同南海なんば站)
沿線都喺なにわ筋下面。
 
 
其實呢條線巳經計畫咗成30年以上,只不過因為起呢條線要幾千億同起完後由邊個用嘅問題嘈左好耐,所以一直只聞樓梯響。
 
近年由於外國人観光客増加,所以2008年大阪政府要求起呢條線路,1年後JR西日本同5大關関西私鉄先肯開會坐低嘈。去到2014年大家先開始有計傾...
 
嘈嘅最大原因係向南個邊,JR西日本已經係1996年時將JR難波站由地面站改為地底站。
JR難波站已經予留空間方便日後延長至なにわ筋線。
 
JR想獨佔成條なにわ筋線,連同通左車嘅おおさか東線南段,2019年通車嘅おおさか東線北段(放出至新大阪),上年開始動工地下化嘅東海道支線梅田貨物線(中津至福島、由經北梅田站)及関西本線(JR難波至久寳寺站)就會成為大阪外環線。
 
 
而南海電鐵就因為未決定なにわ筋線由邊間公司負責,所以南海なんば站一直都只係翻新又翻新。
 
呢條線最大得益者其實係JR西日本。
 
第1:JR西日本一向都只係喺大阪中心之外,去中之島、心斎橋及本町嘅客好多流咗去大阪市營地下鐵。
喺中之島,心斎橋及本町有站的話就唔洗再轉大阪市營地下鐵,搶返由市營地下鐵喺外圍轉私鐵嘅客。
 
第2:なにわ筋線最多中途只有3個站,關西機場嘅JR特急はるか(遙)唔需要再用家下大阪環状線,比家下大阪環状線少左4個站(如果中間會起中之島、心斎橋及本町站的話)由新大阪去關西機場只要40分鐘,快左近15分鐘。
 
第3:列車過密嘅大阪環状線西面可以舒緩,家下朝早大阪環状線1個鐘内最多有23班車,特別係西九条站,因為西九条連接住櫻島線,即係大家所知去USJ環球片場個條線!
 
為左未來會經過奈良嘅中央新幹線,由關西本線都要加多啲班次由奈良直入大阪環状線内。
 
仲有關西機場都因為起緊第3客運大樓,即係以後關西機場仲可以處理多啲航班,去關西機場嘅火車亦要加班應付。
 
同樣地南海電鐵就怕JR西日本開なにわ筋線後,搶走御堂筋線喺難波轉南海電鐵客,所以要求なにわ筋線一定要有份用,而自己可以入到なにわ筋線亦可以搶走以前御堂筋線轉南海電鐵嘅客,甚至直達梅田,搶走埋其他私鐵客,令到其他私鐵沿線住家及客搬去南海電鐵沿線。所以件事就拖咗近30年...
 
最傷個個就喺大阪市營地下鐵?未必,因為御堂筋線都已經係過密情況,大阪市想處理好耐!
 
另外大阪市一直都想廢止左大阪伊丹機場。
因為關西機場去大阪市中心要成60分鐘,而由伊丹機場去大阪市中心只係20分鐘。當關西機場去大阪市中心可以縮短時間的話,反對廢止大阪伊丹機場嘅聲音自然會減小。仲有之後中央新幹線開通後,來往東京羽田至大阪伊丹嘅飛機班次亦予計因客量不足而廢止,到時候大阪市就大條道理廢止伊丹機場用黎賣地。
 
所以起なにわ筋線後,對大阪市並非全部不利。
 
成件事到幾日前,JR西日本同南海電鐵終於傾掂數,共同使用なにわ筋線!
咁就可以開始下一歩喇~~~
 
通常日本起鐵路由拍板到通車...都要十幾年...
大家暫時忍下由梅田、大阪個一帶去關西機場啦~~
 
不過有另一個好消息,喺大阪站隔離起緊嘅北梅田站同梅田貨物線地下化都順順利利,尋日仲公開咗建築地盤~
2022年可以開始改用地下新線,北梅田站約2023年就可以開始使用。
到時大家就可以喺大阪站或梅田域坐特急はるか直去關西機場喇~~