【人生最歎享受!】浸住足湯睇水中煙花

【人生最歎享受!】浸住足湯睇水中煙花

冬天咁凍識歎嘅都會去浸吓露天溫泉放鬆吓個人,特別係夜晚望住漫天繁星,靜靜地同另一半或者幾個好朋友一齊圍埋傾計嗰種感覺真係好正!
 
如果唔係住溫泉旅館的話介紹大家去一個好地方,就係位於台場嘅「大江戶温泉物語」,喺銀座過去都只係30分鐘倒,就算夜晚黑浸完返去都唔會唔方便,返酒店途中仲可以順便食返個宵夜添!
 
 
其實好多去過東京嘅人都知道呢個大江戶溫泉物語,因為入面唔單止有成8個溫泉區,仲有野食有野買,著住浴衣慢慢逛,閒閒地玩大半日都可能未必捨得走!
 
 
不過今次介紹得畀大家,又點止淨係浸溫泉咁簡單!話畀你地知,喺今年11月26日至2017年2月2日,佔地約2萬5千平方呎嘅露天足湯區將會有勁靚燈飾睇,園方會將燈飾由棧橋位置一路延伸至足湯,更會以光雕投影技術將煙花嘅璀璨帶到去足湯水面,到時唔使頭昂昂都可以hea住欣賞到色彩萬變嘅迷人煙花。
 
只要一步入足湯區,就已經可以睇到棧橋上面舖哂花瓣迎接大家
 
呢個水中煙花係全日本首創,暫時得呢度先有得睇,所以嚟到點都要出足湯區浸返陣!
 
除咗睇足湯區嘅水中煙花之外,園區入面仲有好多野好玩,成日去東京但都未嚟過呢度的話下次可以預返啲時間入去放鬆吓,感受吓江戶時代嘅下町風情。
 
入面嘅Game corner有得玩夾公仔。
 
每一個角落都充滿昔日日本嘅味道!
 
識日文的話不妨去占返個卜,睇吓自己前程會唔會似錦。
 
想再歎啲可以玩埋自費嘅「岩鹽風呂」,蒸完一輪成個人都鬆哂~
 
大江戶温泉物語
地址:東京都江東区青海2丁目6番3号
電話:03-5500-1126
營業時間:11:00~09:00
費用:大人 ¥1,780起、小童 ¥980
 
「足水Mapping Illumination NAKED X 大江戶溫泉物語」
活動日期:2016年11月26日(星期六)~2017年2月28日(星期二)