世上最唔敢去嘅壽司店 北韓大型迴轉壽司店開業!

世上最唔敢去嘅壽司店 北韓大型迴轉壽司店開業!

今個月初,北韓開設咗一間大型壽司店,亦都係北韓境內少數提供迴轉壽司嘅「平壤壽司食堂」!大家都知道平壤嘅市民有幾苦...呢間壽司食堂就打正旗號做北韓富豪生意(唔講都唔知原來除咗金仔之外北韓係有富豪*_*)!據說,喺北韓食生嘢係權力嘅象徵,而呢間壽司食堂都係金仔推動要開設嘅添!
 
店內分兩層,第一層能夠容納100名食客,仲有北韓靚女為你送上靚女師傅整嘅壽司。2樓就有四間和室同埋迴轉壽司區,而且仲有得用Touch Mon點菜,真係好先進!
 
 
不過到底北韓壽司可不可信?雖然以上短片記者就話同日本嘅味道差唔多,但有喺北韓工作嘅日本男性就話喺北韓食魚生簡直就係在玩命...呢位先生喺北韓食完刺身、貝類海鮮同韓式生牛肉之後,出現咗人生之中嘅新體驗...「絕對唔係一般嘅攪肚痛...係維持咗成個禮拜嘅肚屙、一個禮拜內不停去廁所。」肚屙都算,北韓嘅廁所連紙巾都冇,呢下先死。日本食客就慘慘豬地話:「我唔知啲北韓人係點解決,我就唯有喊住用自己條手巾仔...」
 

聽講北韓嘅生海鮮鮮度極低,一名提供海產畀北韓嘅先生就解釋:「漁船同漁港設施都無冷凍設備、又無製冰機,根本啲海鮮運到出嚟已經好唔新鮮。加上北韓經常停電,其實生嘅食材好難保存得好。」有網民就發現北韓嘅新聞報道影到嘅店內menu上有「燒鯖魚壽司」同「天婦羅壽司」等唔係屬於魚生嘅壽司。睇嚟喺北韓要經營壽司店都真係幾難。比著你,你又敢唔敢挑機北韓壽司?
 
資料來源:Excite.co.jp