去日本目標就係喪玩同喪食,如果想一次過食盡代表性美食,今次係一個有個好機會!呢個「ふるさと祭り東京2017」唔單止雲集日本全國各地美食,仲將各地大大小小嘅祭典搬入場內,畀所有入場嘅來賓唔使山長水遠走嚟走去都可以睇到七彩花車同精彩舞蹈,感受到唔同祭典各具特色嘅氣氛!
 
各地祭典表演:
 
喺活動期間,唔同日子都有唔同嘅祭典表演,短短9日就邀請咗16個單位喺場內演出,當中有唔少都極吸引,想親身感受日本祭典熱鬧嘅氣氛的話一定唔可以錯過!
 
1. 青森ねぶた祭 (1月11日~1月15日)
 
 
呢個「青森ねぶた祭 」喺每年8月都會於青森舉行,參加嘅觀光客多達300萬人以上,屬日本數一數二嘅大型祭典!活動期間佢地將會將祭典搬入場內,喺「Rassera Rassera」嘅吶喊聲中將氣氛推到最高。
 
2. 弘前ねぷたまつり(1月7日~1月10日)
 
 
呢個祭典嘅最大特色,係佢地以三國志同水滸傳等為題材打造出80台大大小小嘅花車,一邊叫住「Yayado」一邊跳住傳統祭典舞蹈去趕走睡魔,喺昭和50年(1975)更加被指定為重要無形民俗文化財產,可以喺呢度欣賞到真係非常難得!
 
3. 西馬音內盆踊り (1月11日~1月13日)
 
 
「西馬音內盆踊り」係一種好神秘嘅舞蹈,舞者會笠住成塊面只係露出兩隻眼,又神秘又優美,所以亦被稱為「亡者舞蹈」,同阿波舞及郡上舞並稱為「日本三大盆踊り」。
 
4. 秋田竿燈まつり(1月12日~1月15日)
 
 
喺輕快嘅音樂之下,演出者會利用額頭、膊頭同腰操控重達50公斤嘅竿燈,呢個已經有260年歷史嘅傳統活動一定唔可以錯過!
 
全國美食:
 
美食方面呢度分咗好多個唔同嘅主題同Corner,例如「全國當地丼飯選手權」、「好辣但好好味!激辛競技場」、「The 北海食道」等等,最慘就係樣樣都好想試,但肚就得一個,點搞!
 
1. 「全国ご当地どんぶり選手権」
 
 
話明係選手權,食完就當然要投票啦!今年有9道丼物料理參賽,就咁睇已經最少有3至4道好想試,好彩樣樣都係Half Size(¥500),食完一碗應該會仲有位試其他野~
 
2. 「うまい!カラい!ご当地激辛コロシアム」
 
 
呢個係今年新設嘅Corner,可以食到來自日本唔同地方嘅激新料理,當中嘅注目之作非激辛辣椒雪糕莫屬,雪糕上嘅可可粉加入左勁辣辣椒粉,一入口辣椒粉就癡到成口都係,要完成整杯非常高難度!
 
3. 「逸品!逸品!ちょいのせ市場」
 
 
如果想試多幾種食材,呢個Corner超正!只要買完個飯,就可以揀自已想要嘅食材放喺個飯上面,個玩法類似勝手丼,可以製造一個全世界獨一無二丼飯。今年參展嘅每一道都好吸引,除咗有羊、近江牛、佐賀牛等等之外,亦有來自北海道、富山同和歌山嘅海鮮類,非常多選擇。
 
4. 「ザ・北海食道」

 
唔使去到北海道咁遠都可以食到北海道美食真係勁爽!今年參展嘅美食多到數唔哂,必食原隻毛蟹便當「丸ごと一匹毛かに弁当」、勁軟綿嘅Cheese Cake「おもっちーず」、超多料9種海鮮丼「ボタン海老九種盛丼」,有姿勢有實際,十級好味!
 
上年盛況:
 
 
ふるさと祭り東京2017
地點:東京都文京区後楽一丁目3番61号 東京巨蛋
日期:2017年1月7日~1月15日
時間:1月7日~9日、11日~14日 10:00~21:00;1月10日 10:00~19:00、1月15日10:00~18:00
票價:¥1,300~