一包紫菜展現廣島縣民真性情

一包紫菜展現廣島縣民真性情

廣島食物最出名不外乎蠔同御好燒。其實廣島仲有一樣隱藏版名物,係紫菜!
 
紫菜其實無咩特別,但最叻包裝嘅日本人就係可以將平凡化為不平凡。
 
由廣島傳統紫菜店-丸德海苔出品嘅「ワルのりスナック」,係紫菜零食,一共有「瀬戶内檸檬味」同「御好燒味」兩款口味。最特別嘅係包裝,印咗個目露凶光嘅阿叔。
 
白色係御好燒味,黃色係瀬戶内檸檬味
 
口味有兩款,但阿叔有五位,仲有一隻惡鹿,仔細啲睇原來阿叔同隻鹿都係用紫菜砌出黎。包裝左邊段日文字係廣島方言。
 
意思:「How do you do?」
 
意思:「其實我,幾鍾意出風頭」
 
意思:「喂、我呀!你買咗我呢包就好啦~」
 
意思:「此為易碎商品,請不要暴力對待」
 
點解偏偏要印個咁惡嘅阿叔呢﹖其實呢個阿叔係代表廣島縣民。因為廣島方言嘅聲調同發音幾重,令唔識廣島方言嘅人以為廣島人好惡。其實佢哋好温柔,好好人㗎~
所以只要拆咗張黃色(或白色)包裝紙,就會見到少女漫畫風嘅BLING BLING眼。
 
包裝紙後面有日文標準語翻譯。
呢啲係咪叫反差萌﹖
憑住咁搞笑嘅包裝,呢包紫菜仲得到「鄉土名物of The Year」嘅Best Idea獎。
 
除咗呢4款通常版,之前仲出過白色情人節特別版。
呢兩個阿叔好可愛呀!!
 
呢包紫菜連日本人去廣島都會買,聽講新幹線廣島站月台都有得賣。買返黎做手信都幾好,有得睇有得食。不過想儲齊都唔係咁易,因為鹿仔係稀有包裝,只佔總出貨量嘅5%。
 
價格:350円(未含稅)
發售點:廣島百貨店、土產物店等