2016嘅每一日太陽照常升起，而太陽國嘅每一日亦都如常地發生着大大小小嘅二三事，當中會唔會有啲令你開興過、傷心過、嬲豬過，而善忘嘅你又已經極速忘記咗？唔記得咗唔緊要，睇下以下14件2016大事喚返醒你沉睡咗嘅記憶啦！
一月
Becky川谷繪音不倫戀曝光
31歲的日本混血女星Becky一向幾受大眾歡迎～可皆一月嗰陣畀《週刊文春》踢爆做第三者，同樂隊極品下流少女的27歲已婚主音川谷繪音搞地下情。
結果大家一講Becky就淨係諗起不倫兩個字，到而家仍然未有咩job做，相反川谷繪音就風山水起…真係同人唔同命，同遮唔同柄啊…
2月
前巨人球星清原和博因持有毒品被捕
今年2月清原和博因持有毒品被捕，被判刑2年半、緩刑4年。而清原和博亦坦言球員時期亦都曾經服用興奮劑以增強運動場上的表現…
依單新聞一出，一班巨人fans實喊到豬頭咁啦…
3月
北海道新幹線開業
北海道新幹線連接咗北海道同東北地方，從此四國以外嘅日本本土3島都可以搭新幹線去啦～～～
（雖然我都係會想搭飛機去北海道多啲…）
4月
老牌子ガリガリくん雪條加價
你可能會覺得加價依啲嘢都見到冇晒感覺（睇地鐵就知）
但係ガリガリくん雪條就1991年開始到2016年初都一直keep住60yen一條，25年不變。
今年4月因為真係做唔住，公司決定加價10yen，社長因為好內疚而率領過百員工鞠躬道歉，仲登埋報紙㖭！咁有良心嘅公司真係係邊到搵啊！
熊本大地震
4月16號九州發生7級大地震，最後有約49人遇難；熊本城天守閣屋頂瓦片掉落，城牆亦都受到破壞…
不過熊本而家已經好歡迎遊客去玩，大家如果想去九州都可以考慮吓㗎！
7月
POKEMON GO一出，即刻成街都係小精靈訓練員
嗯，依個就唔洗多講，相信你同我都曾經沉迷過嘅遊戲（笑）
（不過我12 lv就已經放棄咗）
8月
SMAP宣佈年內解散
嘩嘩嘩依單真係震驚十三億人（或更多）
之前又話唔解散開晒記者會咁最後都係要分手（哭）
一直以來多謝你地陪住我地咁耐，辛苦晒啦（泣
《PPAP》熱潮hit爆全球
日本搞笑藝人古坂大魔王所扮嘅歌手「Piko太郎」喺日本發表咗依首《PPAP》，結果好快就引起日本高中生嘅模仿潮，甚至外國明星都扮埋一份，真係hit爆全球啊～
你的名字 感動眾生
新海誠導演執導嘅《你的名字。 》（君の名は。）講述一男一女交換靈魂、互相尋找嘅故事～電影一上畫就連霸晒日本嘅票房冠軍，更加係吉卜力工作室作品以外唯一一套超越過百億yen票房嘅日本動畫電影，好犀利㗎！
築地唔搬住啦！
築地唔搬住，邊個最開心？好可能係香港人最開心（笑）
真係每次去都見到好多好多香港人，係咪香港人係東京嘅高級食堂？（笑）
10月
PLAYSTATION出VR!
VR其實姐係虛擬實境，依舊嘢出咗，你話邊個最開心啊？好可能係宅宅們最開心！
講真，我見到啲按摩棒遊戲（拎住支嘢幫「女朋友」按摩）啊，訓大脾遊戲啊，都不禁覺得發明依啲嘢嘅人太有才！
11月
福岡地陷
嚇死寶寶啦！11月福岡JR博多站附近一段路面出現巨型地坑，路面石屎、交通燈、路牌等等全部跌晒落個坑，好彩冇人受傷！
當時各機關日以繼夜夜以繼日搶修，用咗一個星期就重開地陷路段，成為一時佳話～
可惜後來又再次發生迷你小地陷，真係老貓燒鬚啦～
關東11月就落初雪
再次諗返起一樣覺得好感動！54年第一次咁早落初雪！
雖然唔係啲咩嘢好事，但係見到初雪嗰吓嘅感動，我到而家都仲記得好清楚…
12月
流行語大賞「神ってる」奪冠
「神ってる」係來自職業棒球隊廣島鯉魚緒方孝市監督嘅對白。佢用依個字去形容連續兩場比賽都打出第9局關鍵決勝分嘅全壘打嘅鈴木誠也選手，形容佢「神級」咁勁喎！
About Post Author
