Summer Sonic 2016 開催!樂隊介紹,門票,注意事項

今年 Summer Sonic 又就快到喇,Summer sonic 喺日本夏日最大型嘅音樂節之一。會邀請世界上知名嘅樂隊嚟表演,今年嘅陣容就有 Radiohead, Underworld, Fergie, Panic! at the disco 等等
 
Summer Sonic 係每年嘅八月都會喺東京同大阪舉行兩日一夜嘅音樂節,世界各地嘅樂迷都會入場享受呢個盛大嘅派對!今年嘅日子喺 8月20日同 8月21日,東京同大阪一樣日子,不過樂隊出場日子就會調轉。
 
 
今年嘅主打一定喺 1985年就出道嘅英偶搖滾樂隊 Radiohead,佢地自從 2011年出咗《The King of Limbs》之後,等到今年先再有新碟!相信好多人都等咗好耐,將會去再睹風彩。
 
我另一隊推介嘅近年大熱嘅 Pop rock 樂隊 Panic! at the disco,來自美國嘅佢地以輕快音樂又有少少陰沉曲風吸引好多年輕人歡迎,當然靚仔都喺原因之一。佢地嘅音樂令我諗起已經解散咗嘅 My chemical romance,雖然今次唔可以上到最大嘅舞台 Marine stage,不過遲吓一定有機會!
 
好喇,介紹多一隊,來自日本本土嘅 Babymetal,就算聽唔聽重金屬都可能會聽過佢地。佢地喺三個好細個嘅女仔,平均年齡只有17歲。可愛外表同聲線配上金屬音樂,產生咗一種獨一無二嘅可愛金屬曲風,爆紅全世界。
 
門票
 
2016年8月20日 -8月21日
 
東京:16,500円/一日卷
            30,500円/兩日卷
            30,000円/一日白金卷
 
大阪:14,000円/一日卷
            25,500円/兩日卷
            25,000円/一日白金卷
 
買門票有分左(L)、右(R)區,其實只係Marine stage 會分咗左右企位,好似平時睇 band show 咁姐,無咩大分別。
 
白金卷差唔多就係 VIP嘅意思,特權包括:Welcome Drink,專屬觀賞區,購買周邊嘅獨立排隊通道,獨立存物櫃。
 
香港購票方法
方法一:樂天,貴10%,不過就要當日去到現場先有得拎票
方法二:Ticketbis,貴好多,價格不一,不過有得寄埋比你
 
最好嘅方法… 都係搵日本朋友幫手,直接上官網買然後去 family mart 拎就可以~
不過無論點,都要快啲買票,而家買差唔多嫁喇,好快就會無晒!
 
會場位置
 
東京會場就係千葉嘅幕張地區,搭 JR京葉線快速・蘇我行線,到海浜幕張駅再行 15分鐘就可以到達。由 JR東京站出發去到需要大約一個鐘。
 
大阪會場就係舞州,搭 JR 去到 JR桜島駅,落車之後如果行路需要行一個鐘多啲,所以應該搭桜島駅嘅接駁車(四百円/一天)。
 
兩個會場其實離市區都唔係遠,所以只係去一日嘅即日來回都可以。由於會場係零晨 5:00到早上 09:00/10:00 會關門,所以去兩日嘅朋友就需要係附近搵定地方喇,不過大多數人都係訓街等到九點(大阪十點)。
 
 
 
小弟 2012年果時去過東京嘅 Summer Sonic,所以可以講下個場大約係點。
 
分開兩邊,幕張Messe同QVC Marine Field。
 
Messe 係一個全室內區嚟,有三個比較細嘅舞台。
 
QVC Marine Field 就係室外區,最大嘅舞台就係一個棒球場 Marine stage,另外就有喺沙灘嘅 Beach stage 同埋係草地上嘅 Garden stage。
 
除咗舞台之外,成個 Summer Sonic 區都會有好多大大少少嘅攤位,當然有好多樂隊衫買,亦有好多野食,而且啲野食都好食,仲有賣吓手作,彩繪果啲。
所以又要睇表演又要玩,一日睇晒係唔夠時間嘅。所以果次我都係主力睇表演。
 
果日會好攰好攰,所以唔好袋咁多野去,可以帶定雨衣,萬一落雨就好方便,不過最重要係記得帶毛巾!!!去到會見到每個人都拎住一條,因為真係好熱,會好大汗!