【PS4】(有片)Persona 5 遊戲介紹+試玩心得

 
目前進度:佐倉双葉 迷宮探索中
 
如果有Like開我Facebook Page:Anne 偽現充的日常 嘅話,都會知道我最近好熱衷玩一隻新遊戲:Persona 5(女神異聞錄5)!因為好想同大家推介呢隻遊戲,所以特登邀請咗「工作人員Peter」同我一齊錄咗條片,畀大家可以試下睇隻遊戲嘅玩法同Quality!

 

如果想知道隻game嘅風格、畫面、初步劇情等,建議可以睇咗上面條片先呀XD

 

利申:今次係小妹第一次寫遊戲感想文,亦都係第一次玩女神異聞錄系列嘅遊戲,所以會着重講返今次作品嘅特別之處,較少對比系列前作。本文亦以輕鬆交流分享為主,請多多指教~

 

畫面:唔好講笑,雖然冇玩過前作唔知以前嘅版本係點,但今次我玩咗頭5分鐘已經鍾意咗隻game。本作以倒敘手法描述故事內容,第一篇就以華麗嘅賭場背景作教學場景。
 
先不論Production I.G製作嘅超高清動畫睇到我呢個宅女好興奮,就連遊戲內最主要嘅CG畫風呀、背景等到設計得好正,超有代入感。
 
不能不提嘅就係超真實嘅日常生活場景:涉谷、新宿等東京街頭嘅設計係超級真實!真係好似行緊喺涉谷街頭咁!
 
而本作另外最重要嘅場景就係每個壞角色心入面嘅迷宮「パレス」,每個迷宮都設計得相當耐玩同華麗,而且越去到遊戲後期越精彩!相對之下無咩崩壞嘅場景呢~(除咗無限loop嘅メメントス大眾迷宮有少少重複外...)
 
另外手機chat room嘅設計都值得一讚!(唔排除小編見識少,但真心覺得個系統同打字效果做得好靚好真實)

 

音樂:一開頭我覺得隻game啲配樂好正嘅!日常生活同入侵迷宮嘅配樂係唔同風格,日常生活背景音樂較慢板輕鬆同relax,不過有時深夜玩聽到我幾眼訓(尤其男主房入面)。去到後期都開始覺得有少少重複就開始覺得有少少悶...(可能因為玩咗太多個鐘 XD)要去到每個新迷宮嘅時先會有驚喜。

 

系統:都係嗰句,無玩過前作唔知以前嘅系統如何,不過聽講RPG部分大個解謎部分。不過今次我就覺得完完全全係迷宮解題先係亮點,就連日常嘅RPG行動同儲數值都係為咗係迷宮破關嘅時候更成功。每個迷宮mission都會有限期,必須在限期內完成任務偷到寶藏先得。
 
我第一關掛住玩RPG差啲唔夠時間,僅僅係限期前一日偷完寶藏。雖然好感謝隻game設計可以破迷宮得嚟自己選擇嗰日入唔入迷宮、定選擇過現實生活,不過大家一定要小心限期,定期係safe room問下其他角色check住自己進度啊!
 
迷宮入面除咗有啲基本推理,當然仲有打鬥同避過重重陷阱(例如可惡的閉路電視...)我自己就打得幾過癮。打鬥方面每個Persona都有唔同屬性,一開始唔上手好容易浪費SP,上手後就識得睇人地弱點再選擇Persona攻擊~
 
隊中角色多咗之後仲可以揀選隊友探索,以唔同隊形應戰~個人覺得打鬥畫面流暢所以玩得幾爽!
 
(講數系統都幾好笑,成功嘅話可以慳番好多力水)總括黎講都唔係算好難,不過都要睇彩數,要盡量以最少既SP擊退敵人就可以喺迷宮搵路搵耐啲!(最怕去到下一個Safe Room之前用哂啲SP)

 

然後今次嘅COOP都聽講好似較前作多咗選擇,而且喺可以同特定角色建立關係,而唔係過往作品嘅路人角色。我自己就覺得COOP建立關係並唔難,而且重要角色通常都會自己搵你,你自己睇下答唔答應。
 
相反,建立男主角自身嘅數值就要儲好耐...而且有啲角色嘅COOP係要你某方面數值較高先可以建立(例如魅力、智慧等),所以建議大家唔好吝嗇,上堂答問題嗰啲位盡情睇住攻略答吧!可以慳番好多時間架!

 

聽講仲有戀愛系統,不過我就未玩到個到,so far 三個主要女角色都幾kawaii,而且大家屬性完全唔同~我都好期待快啲玩到個part xD(好似仲有第四個)

 

劇情:既然我唔可以用前作做比較,我就直接將自己感受講出嚟啦~其實老實講我唔係特別鍾意打RPG嘅人,通常去到遊戲中段好容易見悶容易斷...但今次我覺得隻game去到中段以後都仲叫有劇情值得我期待。因為遊戲講述要打敗社會上嘅人渣,所以其實一隻幾充滿正能量幾嘅game,都幾可以抒發到我對現實生活嘅怨氣(笑)。
 
可能因為每個迷宮都好有特點,所以我玩隻game最大嘅動力就係想快啲玩下一個迷宮或知道下一個target係咩人。不過換個角度睇,都可能因為劇情有啲弱。日常生活RPG部分直頭唔係好關劇情事,反而角色之間嘅對話或小劇情都幾吸引。

 

人設:一個字:正。每個角色都有個性特點,而且幾有化學作用。
 
我最鍾意睇啲人互相吐槽,而日常部分都做到呢個效果,幾好笑!加上超級豪華嘅聲優陣容(福山潤配唔需要講嘢嘅男主會唔會太浪費xD),作為一個動漫愛好者完全覺得非常完美~(宮野真守、水樹奈奈、杉田智和、悠木碧、大谷育江...全部冇得輸)
 
個人覺得就算係配角、甚至非主線劇情角色設定都幾正:
 
總括而言:雖然我係咁讚隻game,不過我必須說,如果唔識日文玩呢隻game就應該冇可能100%感受到隻game好玩嘅地方架嘞。不過要上手就其實都唔難,最多係戰鬥吹水或者傾計嗰啲位會有少少影響啫~中文版2017年會推出,如果擔心唔明好難玩,可以等下~
 
另外有同事玩慣歐美game話覺得迷宮探索系統全部都自己㩒掣先郁(例如企係窗邊但唔㩒掣都唔會跌落街)有少少兒戲,但我就覺得其實重點唔係控制,而係探索迷宮整個過程。因為每個迷宮其實都好好好好大...所以真係要預好時間。
 
隻game真係好耐玩(不過都好睇人嘅),我就已經玩咗唔知60個鐘多啲(我慣咗唔飛人講嘢同埋會仔細睇劇情)~
 
如果想試玩Persona系列我覺得入手呢隻game係完全冇問題嘅!