Pokémon城市傳聞(1)… 聽完會死嘅紫苑鎮音調?

Pokémon城市傳聞(1)… 聽完會死嘅紫苑鎮音調?

 

今次想同大家講嘅寵物小精靈傳聞,都算係有啲離題,雖然佢係日本嘅作品,不過傳出傳聞嘅就係「海外版」,不過呢個傳聞嘅「主角」,喺日本又確實係「國民級」嘅東西。總之細節就唔好理咁多啦。(喂
今次要講嘅傳聞係〜〜「紫苑鎮綜合症」
首先,紫苑鎮究竟係邊度? 東京? 大阪? 青森? 福島? 大家唔使搵啦,因為呢個地方係虛構嘅!佢係一個曾於寵物小精靈的紅綠藍黃版、火紅葉綠版、金銀水晶版同心金魂銀版出現,關都地方人口最多嘅鎮(41人…據說原形係千葉嘅成田市)
Pokémon城市傳聞(1)… 聽完會死嘅紫苑鎮音調?
心金魂銀版的紫苑鎮
紫苑鎮綜合症
紫苑鎮綜合症(The Lavender Town Syndrome)的傳說其實是從海外傳出來的。據rickey.org(帖現已不存在)稱,1996年2月27日左右的時間,即寵物小精靈紅/綠發售後嘅幾日後,某大型開發商某FREAK開始收到消息,指有10-15歲年齡層嘅玩家連續出現死亡個案。
而呢啲個案,由於京都內務府出於對公司信息披露法保護而將所有個案作低調處理了(其實小編唔係好明)。而某FREAK亦開始針對性統計所有死╱傷報告,根據前僱員佐藤春惠洩漏嘅調查報告,某FREAK發現到以下幾點:
1.患者都是於遊戲進度到達「紫苑鎮」這個地區時發病
2.病徵包括頭痛和偏頭痛,眼睛和耳朵流血
3.患者容易情緒不穩、易怒、對遊戲上癮、無故使用暴力、社交萎縮及反應遲鈍4.在約 67%病例中,病人有自殺傾向。
5.患者玩遊戲時會戴上耳機
6.所有患者都集中在7至12歲之間
7.患者數目超過二百名,估計其中7成同「紫苑鎮」的背境音樂有關。
由於第7點嘅關係,整件事件就被稱為「紫苑鎮音調」,而受影響嘅人就被稱為「紫苑鎮綜合症」患者。
Pokémon城市傳聞(1)… 聽完會死嘅紫苑鎮音調?
Pokémon城市傳聞(1)… 聽完會死嘅紫苑鎮音調?
傳聞引起紫苑鎮綜合症嘅紅及綠版
咩係「紫苑鎮音調」?
傳說聽完會自殺既初版
更正後既音樂
咁究竟咩係「紫苑鎮音調」事件呢? 關於這件傳聞,除咗之前提過嘅佐藤春惠之外,其實重存在住幾個人物。那就是一個所謂嘅開發小組組員,關內直及其幾個下屬。
據稱關先生曾經向遊戲雜誌Game’s Dimensions 雜誌披露,在設計紫苑鎮時就已經決定要令佢喺各方面都要同其他市營造出完全唔同嘅感覺。所以紫苑鎮不但人口少而冷清,甚至連道場也沒有,連背景音樂也是非常詭異。而呢首音樂,正是事件嘅中心。
據稱,紫苑鎮嘅背景音樂,其實存在兩個版本,而舊版本嘅音樂,就係做成一係列死亡個案嘅原凶。關於這個舊版音樂嘅傳聞,日本及日本以外嘅地區分別有兩個講法。
日本國內一般都認為舊版(BETA版)係嚟自海外版嘅試驗版。因不明原因而引致部分正式版遊戲內沒有換掉BETA版嘅音樂就推出。而海外則又是搬出關內直嘅講法。
據關所言,首批遊戲是用了一種實驗性的「雙節拍」(binaural beats)音樂,其實也沒甚麼特別的,所謂「雙節拍」其實現在相當普通,其實就只不過是立體聲而已(即係將一首歌嘅旋律分拆,分別從左、右耳播放)。
不過在初版發售後,卻傳來上頭嘅命令,「紫苑鎮嘅背景音樂,因為會令兒童不安而要修改。」及後內部嘅「路邊社」更傳出有多達200多青少年,由於兒童嘅耳朵構造尚未發育完全而受音樂影響,而引致出現燥狂,甚至自殘嘅狀況。所以而家流通嘅版本,該音樂已經是經修改嘅「新版」。
而由於流出嘅第一版由於流出量極少,加上任天堂有效率嘅回收,而家已經沒有人持有第一版嘅遊戲(當然亦可能係持有嘅人沒有對外公開。)二百幾單受影響嘅個案,就咁就煙沒於時間當中。
Pokémon城市傳聞(1)… 聽完會死嘅紫苑鎮音調?
關都地方,擺明係千葉同房總半島啊~~ 紅圈地方就係紫苑鎮
「紫苑鎮音調」是否可信?
雖然紫苑鎮嘅傳聞(冇錯,紫苑鎮嘅傳聞係唔止紫苑鎮音調。)已經傳遍世界各地嘅遊戲玩家圈子,甚至已經到咗連一啲唔玩遊戲機嘅人都略有所聞嘅地步! 不過多人講還多人講,內容農場直播太空漫步都多人講,唔通你又信﹖
其實「紫苑鎮音調」成個傳聞係有好多疑點,甚至有人聲稱見過傳聞嘅原文,重見到原文末段寫到明係虛構添。當然段原文天係冇人見過。而傳聞有幾個比較明顯嘅疑點,例如﹕
1.政府真係掩飾到真相﹖
傳聞提到「由於京都內務府出於對公司信息披露法保護而將所有個案作低調處理」,首先,政府好似係冇京都內務府呢個部門……
而且,政府都唔見得可以遮得住件事,咁多人中招,又死又傷,真係冇可能冇家長出嚟爆響口囉。最少1997年《寵物小精靈》第38集播放時畫面引起部分人的光敏反應,甚至有如癲癇般嘅急性光過敏症導致685人入院。如果紫苑鎮音調係真嘅嗰時唔可能冇傳媒唔攞埋出嚟一齊講。
2.開發團隊真有其人﹖
無論係前僱員佐藤春惠、開發小組組員關內直及其幾個下屬,都係完全唔能夠喺任何遊戲開發人員名單,甚至遊戲新聞上搵到佢地,甚至連遊戲雜誌Game’s Dimensions都係搵唔到任何資料。究竟佢地係咪真實存在﹖
3.聽覺進化﹖
傳出有多達200多青少年,由於兒童嘅耳朵構造尚未發育完全而受音樂影響,而引致出現燥狂,甚至自殘嘅狀況。」其實兒童聽力俾成人更好。例如高頻聲音就只有兒童聽得到,因為成年人耳蝸功能退步係會隨成長退步。所以上述論點其實係唔成立。
4.「雙節拍」其實好普通
關於實驗性的「雙節拍」(binaural beats)音樂,其實而家所有立體聲耳機都有用到,如果文中論點屬實,唔怪得香港人咁燥……
5.冇可能全部回收
文中提及「由於流出嘅第一版由於流出量極少,加上任天堂有效率嘅回收,而家已經沒有人持有第一版嘅遊戲。」要將所有流出市面嘅遊戲係無限接近不可能! 最少買下遊戲而冇「出事」嘅玩家一定唔會攞隻即將絕版嘅初版遊戲出嚟。而今時今日連張比卡超卡都可以賣600萬日圓,很難想像會沒有人不將初版遊戲放售。
Pokémon城市傳聞(1)… 聽完會死嘅紫苑鎮音調?
Pokémon城市傳聞(1)… 聽完會死嘅紫苑鎮音調?
紫苑鎮眾多詭異傳說之一,有機會(大家有興趣)再講……
城市傳聞最有趣嘅地方係無論件事幾精密/荒謬,你都冇辦法證實佢真的假,而只能俾佢繼續流傳下去。無論「紫苑鎮音調」係真係假,只要佢能夠成為大家茶餘飯後嘅話題咁就夠!
今次休息完一次,下次(如果有),就又講返鬼啦。(快啲入去支持上次嘅鬼故「難波超猛鬼BC電器舖」系列﹕傳送門)下次將會講一個香港人有可能聽過好幾次嘅「號稱關東最猛鬼屋」(唔係池袋太子,不敗前輩應該冇講過,不過香港係有人講過……)。
敬請留意下回!!
Pokémon城市傳聞(1)… 聽完會死嘅紫苑鎮音調?
紫苑鎮眾多詭異傳說之一,有機會(大家有興趣)再講……