OCAMP玩依啲,挑戰東大生底線?!

 
Mika嘅日文學校啱啱開學,迎新活動玩埋晒啲咩人肉包剪揼,心靈感應(解手遊戲)之類健康過一日一蘋果嘅益智遊戲,不禁令我諗起早排某大專嘅特別嘅Ocamp遊戲玩法~
 
為免善忘嘅大家已經唔記得發生過咩嘢事,等我recall返大家啲memory先!冇錯啦就係依張lam lam腳圖啦~~
 
有人覺得大家大驚少怪,人地外國都係咁啦諸如此類,亦有人覺得傷風敗德,如果佢呀媽知道佢做過啲咁嘅事一定好傷心~
與此同時,因為唔少人都覺得日本人係玩依啲遊戲個陣非常open,但事實到底係真唔係,始終都係一個謎。
為咗進一步了解日本大學生到底點睇依類型特別嘅ocamp遊戲,Mika就去到東京第一學府東京大學膽粗粗訪問吓大學生們到底有咩睇法~
 
一入到去我已經後悔,諗咩啲咩屎橋做咩啲咩白痴街訪……東大啊依到係東大啊!人地係嚟做學問㗎!你講咩嘢OCAMO啊?人哋冇依啲咁嘅嘢㗎!
冇計啦,都洗濕咗個頭,唔通咩都唔做返公司搏炒咩!都要頂硬上……好羞愧啊……
 
問:Ocamp玩啲咁嘅遊戲你點睇啊?
第一位同學已經令我尷尬想搵個窿捐。
同學X:東大生連飲酒都要先作多番考慮,更何況係玩依啲咁嘅遊戲?我地學校玩嘅大部份遊戲都係食腦嘅……依啲咁嘅遊戲……我真係諗都冇諗過!
(諗起大學個陣食宵成日成枝啤咁隊……有一刻我想抹去嗰啲記憶嗚哈哈)
 
嚟到依對爆笑兄弟,我真係好想多謝佢地!原來東大生都係識笑嘅!你地嘅笑容係我最大嘅力量!些些!
爆笑兄弟左:個女仔好似好慘咁啊哈哈哈哈哈~~~~就算真係想咁玩都會忍住囉~~
爆笑兄弟右:好似好爽咁啊啊啊啊啊啊哈哈哈~~~~喂你咁嘅講法好似有啲衰衰咁喎!
 
答:唔通依個係香港獨有嘅文化?但係如果係日本咁樣做嘅話可能會構定犯罪都未定……
(放心各位我花咗好多好多口水去解釋香港並唔係咁嘅)
 
依位女同學都話覺得係犯罪咁話!
 
(驚訝狀):(媽我到底睇緊啲咩啊!)lam?佢地係咪lam緊?我唔想玩啊/0\
 
 
答:如果大家玩得開心都冇咩問題嘅~但係如果人地唔想玩就唔可以逼人玩囉!
 
不嬲都唔會企係道德高地批判人,所以我都唔會話而家啲後生點點點點點~
只不過,當我一諗到如果我係個女仔無啦啦畀人lam,而咁啱前一日我又冇沖涼,咁佢地咪會發現我嘅秘密?!
諗到依到,我都係同日本嘅大家一樣,接 受 唔 到 啊~~~~