Natural Kitchen 100YEN 田園風雜貨店

近年小清新田園風非常流行,但係唔知點解款式越樸素、設計越簡單就越貴……好似簡簡單單一隻木碟都要過百蚊,買左隻碟又想買埋隻叉,有碟有叉又冇理由冇羹……諗下諗下好似都係買埋碗先得……買下買下,咦?小姐你好似唔夠錢找數喎!好彩好彩,日本Natural Kitchen 簡直就係平價田園風雜貨嘅天堂,大家唔好走寶啦!
 
 
 
 
點呀?見唔見到亮點係邊到呀?冇錯呀就係個牌啦~上面寫住冇標價嘅商品全部都係100yen咋!係咪好興奮呢~
 
到底100yen可以買到啲咩呢?我就真心推介依隻木羹!雖然DAISO都有木羹,但我覺得Natural Kitchen嘅木羹係最好用嘅!其他鋪頭嘅有啲淺得滯畢唔到啲咩、木紋又淺、揸落又硬膠膠……Natural Kitchen嘅木色最靚,深度又啱啱好畢飯畢湯都得,100yen咋冇得輸啦!
 
另外大受歡近嘅產品就係木筷子啦!100yen一對係咪好抵呢?不過等等先!彩色個5對加埋都係300yen,咁咪姐係仲平過100yen一對個啲!如果你唔係追求成對筷子都係木色嘅話,同朋友一人一對做五色筷子戰隊都幾開心㗎~
 
天呀勁勁勁靚呀一千對心心眼!放個杯係上面即刻high class咗勁多!
 
想知道一個人有冇生活態度呢,睇佢係將對筷子插落個飯到吖,定係將筷子整整齊齊咁放係筷子座上面就知啦~我決定由今日起用筷子座,右下角個好啱我心水!
 
咦?平時食自助餐個D碟點解會係到嘅?搞到我一拎起個碟就想去攞野食==
 
好啦咁300yen又會買到啲咩呢?喂喂點解圓形要貴200yen㗎!
 
依啲有花紋嘅好靚呀!300yen都可以接受啦~~~
 
用依啲玻璃樽放五顏六色嘅糖/意粉一定好靚~~呀呀呀好想將自己間屋變到示範單位咁靚呀!
 
出現了木碟!係20蚊嘅高級木碟呀!不得了呀~~~~仲有好多款㗎!
 
仲有就係田園風餐枱上一定要有嘅布質枱墊啦~信我啦~有咗佢地即刻加90分呀!廿蚊兩塊仲猶豫?即刻買啦!
 
另一樣餐枱上一定要有嘅就係滕籃、滕兜同滕碟啦~左邊個兩個就放餐具、右邊依個放水果,perfect!
 
今年繼續大熱嘅粉藍色絕對係必買item!之但係點解依個袋要500yen呢?原來因為依個係保溫袋嚟㗎~用嚟放便當就一流啦~(如果你係會做便當嘅話)
 
話說Natural Kitchen有好多收納用品,我啱啱搬嚟日本個陣係吉祥寺店買左好多籃同箱放雜物~~執野個陣塞晒入去就得,勁方便(誤!)
 
最近日本成日都落毛毛雨,好煩呀!依件雨褸幾通爽㗎~不過香港好似冇咩人會著雨褸……
 
睇完餐具就睇下園藝用品啦~放啲小擺設係窗邊即刻加晒分!
 
 
 
依啲係用嚟放盆栽嘅!我覺得呀媽如果見到依個post佢最後會超重返香港……
 
 
鍾意DIY嘅朋友仔可以嚟依到尋寶~
 
木畫架仔+水松板/黑板仔!有咩想同屋企人講就寫係黑板仔上面,好窩心呀~
 
最後依個袋係咪好靚呢?15周年紀念tote bag嚟㗎,超級百搭顏色又靚~500yen咋~
 
想知道NATURAL KITCHEN嘅最新消息,可以上雑貨 ナチュラルキッチン個官網到睇~
如果你淨係想買100yen嘅雜貨,可以去SKY TREE個間NATURAL KITCHEN,全部都係100yen㗎!