Like Japan放送室:專訪東京港式茶餐廳-香港贊記茶餐廳

 
今集《Like Japan放送室》,我哋嚟到一間位於東京飯田橋嘅港式茶餐廳-香港贊記茶餐廳!其實我都係聽唔少鍾意香港嘢嘅日本朋友話有時會嚟食下呢度嘅菠蘿包,所以我就決定嚟睇吓呢度有咩特別喇!
 
飯田橋同涉谷、新宿等地區比較唔同,呢度比較多公司同住宅。茶餐廳開喺度都受到好多上班族嘅熱愛。附近都有好多飲食小店,中午時分好多間都出現人龍情況。我就試咗呢度嘅兩款名菜:咖喱牛腩飯同叉燒飯。老闆張先生話咖喱飯係無為日本人調味,係原汁原味嘅香港咖喱。我食過就覺得係香港咖喱魚蛋嘅咖哩味,但珍珠米同香港嘅有點唔同。叉燒都好似好薄身,我初初仲以為會唔好食,但就驚艷咗!因為調味真係做得好,雖然肉身同香港口感唔同,不過就好好食,啲汁都好好送飯~!
 
店主兼老闆張先生40年前就已經嚟過日本工作,當時就係喺飯田橋開始居日生涯。後來回港之後便上國內開餐廳,眨眼間40年過去,張老闆就決定重回日本呢個起點開餐廳,將港式美食引入日本。餐廳開左一年漸漸見人氣,本身香港客人較多,依家就越來越多日本食客嚟食,仲漸漸多個香港、台灣同中國客人!張老闆話日本人都鍾意咖喱、魚蛋、同包點。所以佢哋都好重視做番傳統港式味道。不過張老闆話可惜廚房位置未夠大,未能做出同香港一模一樣嘅奶茶味。我自己就覺得...已經算好好飲!(因為日本奶茶總是偏甜)
 
張老闆話喺日本開店好彩有班朋友幫手,仲建議想喺日本搞朋友生意嘅朋友一定要搵專家提供專業法律意見,因為日本人好重視呢方面嘅誠信。佢仲話遲啲可能會喺池袋開分店,希望到時可以吸引更多日本人品嚐港式美食!

各位留學生、居日港人,如果喺日本思鄉時不妨幫襯吓!:)