【Airbnb尋寶成功】平靚正!真正感受京都的民宿體驗 (網購超方便!)

雖然聽唔少住airbnb中過伏既例子,但老實講訓過晚網吧既筆者已經無所畏懼…今次被選中既就係位於京都稲荷既「Cozy Room」,係正式介紹呢間民宿之前,等我地先睇下Airbnb上提供既資料先,再逐一講返有無佢入面寫既咁好啦

 

首先係房主自己寫既簡介
 
 
佢呢到提到兩點:quiet neighborhoodLess than 10 mins walk to Fushimi Inari Shrine which is selected as NO.1 attraction in Kyoto by Tripadvisor.

 

佢寫明「quiet neighborhood」,咁實際上又係唔係咁靜?確實係!無論朝到早到夜晚凌晨都非常寧靜,除非當日隔離住著個鬼殺咁嘈既住客,否則真係一粒聲都聽唔到,所以當時住左4晚,4晚都訓到成隻豬咁!可能大家會問呢間民宿咁近稲荷神社呢個多旅客既地方,又點會咁靜呢?其實一出稲荷直行就係神社,而向右行就係住宅,基本上無遊客會去個邊

 

選擇住宿其中一個重要既考慮因素就係地點方唔方便,佢呢度就講唔使十分鐘就到,其實都真係差唔多,而且大多數都係直路,就算拎住一大堆行李都唔會話行得好辛苦…
 
不過筆者第一次去既時候大約花左20分鐘!因為入到去住宿區其實間間都差唔多,所以筆者花左十分鐘行到去附近,再額外花多十分鍾搵邊楝先係間民宿,要注意google map係呢個時候已經幫唔到你,因為就算你行到exactly地圖上show個點,都係未必搵到,所以筆者提提大家最好朝早預留少少時間去搵,唯一既記認就係門前個招牌!

 

之後我睇黎睇下住客既評價
 
選擇住宿另一個考慮當然係間房本身乾唔乾淨同舒唔舒服啦,呢位住客確實評得中肯,入到房身一個印象就係好乾淨,唔會有上一位住客留低既痕跡!而且間房地下係鋪疊疊米,同時屋主亦有床舖提供,大家想訓邊樣就任君選擇。大家可能留意到呢間房本身係for兩位人住,但即使一個人去佢都會比成間房你,所以完全唔會覺得好局促,我攤曬啲行李係房都無問題。另外有唔少民宿都係要同其他住客共用廁所同沖涼房,但係呢一間就唔使同人共用廁所,因為就有一間係自己房,有時出出入入又要帶鎖匙都幾麻煩,但呢間房既設計就係可以免去呢種煩惱!
 
 
 
 
基本上大家需要既日常用品同工具,係呢間民宿都一應俱全,沖涼房有齊洗頭水、護髮素同沖涼液當然不在話下,洗衣機同風筒亦當然有得借用,而熱水壺同微波爐就係部伴筆者多個晚上既好顆伴!點解咁講,每晚筆者跟住屋主提供既地圖「獵食」後,都會順便去便利店買一大堆即食麵同零食當宵晚,之後就屈係間房就好嘆咁hea成晚!相比起之前住過既豪華膠囊同網吧,呢間民宿無論大細同通風都爽好多,同時又唔似酒店咁,間房既設計真係可以比人一種返到屋企既感覺,所以筆者係好享受住係呢間民宿既每一晚
 
講到咁正,但筆者提及既缺點到底係啲咩?上文都有講過民宿位於當地住宿區,而住宅區係唔會預人夜晚就周圍行(因為根本無野好行),所以一入黑就真係非!常!黑!平時住慣酒店或者膠囊的話,即使11點過後落到街依然燈光充足;,不過住民宿的話,就要有心理準備附近係無乜街燈…所以筆者開頭夜晚想去個7仔都幾驚…
 
但係屋主(女)自己就話自己成日一個夜晚行都無問題,叫筆主唔使擔心…咁確實行過一次之後其實就會發覺無乜野好驚,最驚就係太黑認唔返間民宿入唔返房囉!而且呢種體驗正正就好似做緊一個日本人而唔係旅客咁,落到街唔會見到人山人海,而係一條超寧靜既街道,其實都幾好feel
 
 
 
而住民宿既另一個好處就係網購超方便!如果住酒店、飯店或者膠囊房的話,唔係話無可能網購到,但一黎送貨公司其實係未必肯送,二黎你要事先同staff講好,但語言又係另一個障礙…而住民宿的話就可以輕易解決以上呢兩個問題,首先因為地址真係住宅地址黎,送貨公區係無可能唔送,第二屋主英文有返咁上下水準,而且有whatsapp作工具,同佢交帶一聲就可以,於是我當日去日本adidas官網落order(好多長期無貨既鞋款日本都有,而且仲要平幾舊!!),兩日就送到!當然個時我係第邊玩緊,屋主就好好人幫我簽收啦,雖然夜晚返到去既時侯屋主走左,但鞋就係間房到,由落order到拎到實物成個過程係超~級輕鬆,大家不妨一試!
 
最後差啲咩未講?就係價錢啦,四晚包所有雜費就$1518,換言之每晚就大約$380。大家覺得抵唔抵?價錢就係網吧同膠囊中間,但我住過最滿意既都係呢間民宿!加上屋主咁nice又幫我簽收,周邊環境又咁靚,實在帶比筆者一個好好既印象~三隻字,有下次!

回覆