就快入秋啦,今年日本秋冬季興著啲咩呢?最近幾個歐美大 Brand 嘅 Fashion Show都影響緊日本嘅 Fashion。而今年日本秋冬女裝嘅特色都係圍繞返【Vintage】,有絲絨喇叭袖衫印花圖案設計等嘅新款,即刻睇下佢哋點樣融入喺日本今季嘅時裝啦!
 
絲絨
今年秋冬季大熱嘅衫款質地,非絲絨莫屬。好多雜誌同日牌嘅新款都係絲絨質地,選色亦十分鮮豔,令衫款感覺更復古。
 
「lilLilly TOKYO」嘅呢件粉紅色長款禮服就係用咗絲絨,再加上閃爍嘅粉紅色,十分有型。
 
「Snidel」呢條粉色絲絨褲加條流鬚Belt,一樣Vintage又型格。
 
「One after another」嘅呢條粉色絲絨褲,闊褲腳再襯紅外套亦十分搶眼。
 
除咗粉紅色絲絨,其實黑/啡/深藍 今年都大熱,但粉紅色比較 Vintage 所以都特別提多啲~ 好想買返件絲絨衫嚟著啊~
 
喇叭袖衫
不得不提今年揭親雜誌都見到嘅長袖喇叭袖上衣,通常個袖都係長到見唔到對手,哈哈。喇叭袖上衣再配搭高腰裙,或者連身裙配個喇叭袖,同樣係今年大熱!
 
中間粉紅色嚟自「HONEY MI HONEY」嘅樽領上衣,同樣有個喇叭袖,粉紅色更顯可愛少女風~
 
左面「Snidel」嘅深啡色連身冷裙同樣有喇叭袖,值得一提嘅係啡色繼續係今年大熱秋冬季顏色,好Vintage!
 
右面Model著住嘅黑色連身裙,有個白色嘅喇叭袖,而領口位亦有反領特別設計,十分可愛。
 
中間「CIROI」嘅 Shirt 都係用咗喇叭袖嘅設計,唔只冷衫,其實上身衣款都同樣可以應用,好搶眼。
 
印花圖案
今季 Gucci Fashion Show都可以見到一啲款色係印花印喺牛仔褸或外套款上,而印花圖案就以大朵花型為主,感覺上更加 Vintage!
 
 
因為呢個設計亦令日本興起呢款衫嘅潮流,以下係小松菜奈嘅示範,牛仔裙上同樣印有舊傳統鮮豔顏色嘅花朵,相信呢類型嘅衣著今年會愈嚟愈多。
 
嚟自「RIZZO」嘅牛仔褲同牛仔裙,同樣印上色彩繽紛嘅印花圖案,令普通嘅牛仔顯得冇咁單調。
 
普通上衣都同樣印上花朵,令設計更獨特同復古。
 
睇完咁多衫款係咪好想添置新衫呢?下次再同大家介紹更多日本 Fashion 資訊啦,Bye Bye!
 
 
Source from Vivi Magazine, Fashion Press