2016 日本京都賞楓/紅葉景點推介!

就嚟入秋,相信唔少朋友都想趁住秋天去日本賞楓葉,今次就想推薦幾個日本京都嘅賞楓景點!點解推薦京都呢,其實係因為喺2014年11月去咗一個星期京都賞楓,嗰次嘅楓葉景真係好靚好靚,愉快嘅旅程令我更加喜歡京都呢個地方!
 
京都最佳觀賞楓葉時期:11月上旬〜12月上旬
 
1.嵐山
喺嵐山賞楓真係人生一大樂事,平時坐喺渡月橋湖畔欣賞到嘅美景,都因為楓葉季而變得份外漂亮,隨便影一張都係張靚相!去嵐山賞楓嘅大家記得提前預約嵐山小火車(或者早啲去到購票),事關楓葉季搭嵐山小火車,隨車就可以觀賞到嵯峨嘅楓葉美景,真係好靚㗎!
 
 
2.常寂光寺
同樣喺嵐山附近嘅常寂光寺,滿開嘅楓葉景色亦十分美!常寂光寺背靠小倉山依山而建,係日蓮宗嘅名剎,亦係京都紅葉著名景點之一。好記得去呢個寺係要行一段徒路先到嘅,去到見到整遍山頭都係紅紅黃黃好鮮豔嘅楓葉,真係覺得一切都好值得!入到去除咗欣賞楓葉,都唔好忘記了解下呢個超過400年歷史嘅寺廟啦!
 
 
==================
常寂光寺
地址:京都市右京区嵯峨小倉山小倉町3
交通 / 
JR 山陰本線(嵯峨野線)嵯峨嵐山站下車 徒步15分鐘
京福嵐山本線 嵐山站下車 徒步20分鐘
參拜時間 / AM 9:00〜PM 5:00 ( PM 4:30受付終了)
參拜費用 / 400円
 
3.東福寺
建於1236年嘅禪剎東福寺被列為京都五山之一,楓葉季時庭園同天橋嘅楓葉交錯,實在賞心悅目。東福寺賞楓好出名㗎,所以楓葉季時會較多遊客,但其楓葉景色真的十分美!
 
 
====================
地址:京都府京都市東山區本町15-778
參拜時間:08:30~16:00 (11月~12月初)
交通資訊◆大眾運輸
・由JR或京阪電氣鐵道「東福寺」站徒歩約10分鍾即可抵達。 
・在京都市公車202、207或208系統「東福寺」站下車即可抵達。
 
4.毘沙門堂
毘沙門堂門跡創建於西元703年,屬於天台宗五門跡之一。較一般寺廟偏遠嘅毘沙門堂,雖然要從車站行20分鐘左右先到,但去到見到楓葉景色真係靚到「嘩!」咗一聲。高矗嘅樹木林立,要行一條長樓梯先上到去門堂,但我哋亦因為咁而變得好迷你,身處喺景內就好似俾紅葉包圍住一樣,真係好靚!
 
 
======================
參觀時間:08:30~17:00
參觀費用:無料(室內參拜500円)
地址:京都市山科區安朱稻荷山町18
交通:唔想換車嘅話,可以從京都車站直接坐JR線,到JR山科駅下或者從京都駅搭乘地下鉄「烏丸線」,到烏丸御池站後換「東西線」一樣到山科駅下車即可。下車後延指標走約20分鐘即可到達。
 
5.平等院
平等院位於日本京都府宇治市,沿著宇治川邊興建,係日本早期木構建築,據信是古代日本人對西方極樂世界的極致具體實現。第一次去京都嘅時候因為時間關係冇去到宇治,而呢一次終於去到啦,仲要係楓葉季,景色一啲都冇令我失望,十分美!
 
 
===================
地址:京都府宇治市宇治蓮華116
參觀時間:庭園開放 上午8:30 關閉 下午5:30
乘坐電車
乘坐JR奈良線至「宇治站」下車,步行10分鐘
乘坐京阪電鐵宇治線至「京阪宇治站」下車,步行10分鐘
 
除咗京都,日本仲有好多地方賞楓都十分靚!記得同我分享你賞楓嘅點滴啊!