$13赤蝦刺身 $18牛扒 日本西友超市抵到爛

好多人問我日本邊間超市抵,我話「SEIYU抵呀!」大家跟住就懶醒咁答:「啊!西武!我識呀!好出名㗎嘛!」喺依到我必須好鄭重咁講一次:SEIYU係西友,唔係西武!西武貴到呀媽都唔認得,去錯唔好瀨我呀!
 
西友夜晚開到11點,好方便呀~放工食完飯先去買餸都仲趕得切!
 
牛排1人份量18蚊(258yen)起就有交易!啲肉紅卜卜好新鮮,絕對唔係下欄菜,好抵買呀!18蚊,係香港買到啲咩扒吖……
 
想兩三個人分嚟食,可以選擇大大塊嘅牛扒,45蚊有找!!
 
豬扒2塊17蚊起……注意,唔係紙咁薄,而係有差唔多成吋咁厚㗎!又唔會好多脂肪,真係好吸引!
 
啱啱個D係用嚟煎/BBQ,依啲就係用黎整生姜燒~一盒大約8塊,23蚊~
 
嘩嘩嘩嘩嘩好好好抵呀!!!!!!赤蝦13蚊有6至7隻!!!!!不過係要即日食嘅~想放多日先食都係21蚊咋!
呀媽成日都話啲減價刺身唔好買,怕唔新鮮喎~不過呀媽而家又唔係日本,我就緊係買嚟試下啦!
冇事喎~好新鮮~~勁好食~~~NICE~~~
 
睇完肉就睇下菜啦~香港人最喜歡食嘅羅馬生菜平時係超市買閒閒地都要30蚊,依到只係需要13蚊!如果係其他刨咗絲嘅生菜只係$4.5..平到你唔信==
 
香港係街市買幾蚊芽菜已經大大袋,不過日本冇街市,只係得依D pack好晒嘅芽菜~一包只係需要2蚊咋,同香港街市有得fight!
 
菇菇呀~嚟咗日本之後我一個星期有4、5日係食佢地~~舞茸同雞脾菇5蚊有找,本菇6蚊有找,好食又擺得,所以雪櫃入面長期都有存貨~
 
辦拿拿!香港買蕉平均2蚊就有一條,但係日本唔知點解有時平均4、5蚊先買到一條,好唔抵呀!(雖然好長!)
西友依到7蚊有4-5條,真係好好好平呀!
 
日本超市好興賣炸物~大家自己煲個飯再加多盒炸物就已經係一餐豪華晚宴~依盒雜錦天婦羅有2隻蝦+蕃薯+茄子+南瓜等等等都係28蚊~吸唔吸引呢~
 
可惜吖,雖然天婦羅又抵又好食,不過我最近生活費有啲拮据,唔敢再食咁豪啦……依啲一包包汁全部都係用嚟送飯送麵,7蚊就可以解決一餐~(計埋米錢最多都係10蚊~)
 
不過10蚊一餐都仲係有啲貴…今個星期開始我決食每晚都食依個送飯-冇錯就係好多人都好驚嘅納豆!納豆本身已經係窮人恩物,平時其他超市特價大約100yen3盒,西友再平啲,85yen3盒!一餐一盒,2蚊就搞店啦~都話2蚊1餐不是夢㗎啦~
 
團子!日本便利店同超級市場都有團子賣,價錢大約100yen左右,本身已經唔貴~西友84yen有4串,姐係唔洗$1.5就有一串……平到冇野好講!
我食過有啲團子咬落去腍滋滋好奇怪,西友嘅團子煙煙韌韌,甜度啱啱好唔會好膩,真心推介~
 
香港大盒裝牛奶平均十幾廿蚊一盒,日本超市平均百幾二百yen一盒,兌返港紙大約14蚊,西友就再平啲,$11.5就有一盒啦~可惜牛奶唔可以一次過買咁多,唔係我真係買一大堆返屋企擺呀!
 
Yogurt!日本嘅乳酪有好多款,款款都好好食~由於太好食嘅關係,依一個月嚟幾乎每日都食一兩盒……食到我窮!好在依到平過出面2、30yen~即刻買多幾盒先~
 
睇完啱啱嘅介紹係咪覺得好抵呢!不過西友都有一樣野係貴過人嘅……就係膠袋啦!
依到膠袋要2yen一個,唔想比依2yen就記得帶個環保袋嚟掃貨啦~~
 
Btw,而家西友全線都幫熊本籌緊款,掃完貨不妨將你嘅心意放入籌款箱入面喔~
 
西友係全日本都有好多分店,想知道邊間近你嘅就要上佢地官網查吓啦!