唔知大家入咗場睇《死亡筆記:照亮新世紀》未呢?想當年《死亡筆記》(Death Note)於全世界掀起風潮,大收28億日元票房。夜神月、L、死神流克、彌海砂等名字,相信大家仲非常有印象。邊個又估到時隔10年,呢套戲會再次拍續集、再次登上香港同世界各地嘅大銀幕?最重要嘅係,連當年嘅角色亦都同樣登場,包括今集再次由戶田惠梨香飾演嘅彌海砂。
 
 
我好記得當年仲係讀緊中學,有啲男仔就大大聲討論要第時搵女朋友要搵個好似彌海砂咁嘅,真心真意咁愛夜神月嘅女仔...想當年戶田就係演呢套戲係電影界嶄露頭角,喺亞洲打嚮名堂,並接二連三獲得拍攝連續劇同電影嘅機會。今次戶田事隔10年再次訪港宣傳《死亡筆記:照亮新世紀》,佢就話覺得同10年前嘅情況同感受一模一樣呀!
 
到底隔咗10年再次演同一個角色,而且係一個咁重要嘅角色,戶田有咩感受呢?佢就話當初得悉有呢個機會嘅時候真係嚇咗跳,不過就好開心可以再次有機會描繪同演繹Misa嘅人生。不過我都覺得電影公司嘅決定係啱嘅,因為Misa除咗戶田真係唔可以係第二個啦~
 
戶田亦都透露今次為準備出現呢個角色非常頭痕,因為10年前Misa係以Lolita同一個雙馬尾長髮為名嘅。但到底過咗10年,Misa變成一個點樣嘅人,外形方面又出現咗咩變化呢?雖然佢諗咗好耐,不過最後都係覺得就咁放啲頭髮落嚟係冇咗Misa嘅味道,而佢隨手紮起啲頭髮嘅時候就覺得都係呢個形象最適合Misa,所以最後電影入面出現嘅Misa嘅髮型就係以咁樣嘅心情製造出嚟架喇!
 
 
今次嘅新作入面有好多新角色,包括東出昌大飾演嘅三島創、池松壯亮飾演嘅L繼承人龍崎、菅田將暉飾演天才黑客、奇拿信徒紫苑優輝等,個個都係非常有特色同型格嘅角色。問到戶田最中意今次邊個新角色嘅時候,佢就答其實係新死神爾瑪!不過其實我都有同感,呢個新嘅白色死神非常優雅同美麗,令我覺得非常心動~
 
 
戶田又話今次新作最印象深刻係同菅田將暉飾演嘅紫苑係車入面第一次見面嘅戲份。如果大家有睇電影,佢亦都覺得Misa有一幕望向天嘅戲份都令佢特別感受深刻。我係呢到就唔劇透喇,不過相信有睇電影嘅大家會明嘅!(未睇就記得留意呢幕啦!)
 
最後戶田話Misa呢個角色係令佢第一次登上大銀幕嘅一個重要角色,所以佢對Misa都有一份特別嘅情感。其實今次嘅作品我就覺得大家千祈唔好太以看待舊作嘅目光去睇呢套戲,好似戶田話,今次嘅作品係一套全新嘅Death Note。最後中意戶田或者死亡筆記系列嘅你就快啲去電影院捧場喇~
 
 
 
 
有關於電影嘅感想非常歡迎大家同小編分享~!

小編專頁:Anne 偽現充的日常