【Like Japan 放送室】專訪昔日玉女偶像 酒井法子

 
 
今次真係好高興可以訪問酒井法子。相信好多中意日本嘅香港人,尤其70後同80後,都會聽過睇過酒井法子嘅作品。《同一屋簷下》、《等你說愛我》等經典作品應該仲留喺大家嘅心中,當年酒井更成功打入中港台地區,更加到過台灣同香港開演唱會,風頭一時無兩。
 
自從2009年藏毒逃離事件發生後,酒井法子理所當然被消失於日本娛樂圈。舊年回歸日本娛樂圈仲擔任過某品牌代言人,但始終印象仍然有陰霾。不過今年係呢位昔日女神嘅出道30週年,除咗開紀念演唱會同推出性感成熟風寫真集回饋粉絲之外,酒井法子到底對自己嘅演藝生涯係點睇,以後到底有咩打算呢?
 
訪問過程中,酒井法子一路好強調今日仍然能繼續進行藝能活動都係因為有粉絲嘅支持同鼓勵。尤其係開完30週年紀念演唱會,酒井法子感觸地表示一路聽著粉絲嘅吶喊同聲音,真係令佢覺得心都暖埋!
 
除此之外,酒井法子都話依家最重要嘅係好好處理眼前每件工作,就連我問依家對愛情點睇嘅時候,女神都話其實已經睇得好淡,覺得有緣份嘅一定會遇到,自己就唔會特別去搵對象。
 
問到酒井法子其實會唔會考慮來中港台發展,畢竟係呢邊人氣依然強勁,而且呢邊嘅人都應該比日本少啲介懷藏毒事件。不過睇得出酒井小姐其實都好重視係日本建立嘅一切,話雖然都希望可以學下中文、希望未來可以有用中文演戲嘅機會,但暫時就未有打算留喺中港台作長遠發展。
 
難得見到酒井法子小姐一面,我地都請咗呢位好鍾意香港嘅女神為粉絲簽名,如果想得到偶像嘅簽名簽名應援扇同海報、甚至係呢個超豪華30週年出道紀念Box Set,就一定要上Like Japan Facebook留comment喇!
 
近距離同酒井法子對談,仍然能夠感受到巨星嘅風韻同氣場。專業同友善嘅表現令本來好緊張嘅筆者都覺得,啊~酒井法子真係好nice~衷心希望酒井小姐能夠繼續在事業找到突破。

回覆

Tony Leung的圖片

ずっと応援してあげるから頑張ってください

jonathankong的圖片

加油!希望能夠多聽酒井小姐的新歌和戲劇。

jonathankong的圖片

另外Anne也請加油給我們多些資訊^_^

Anne的圖片
謝謝支持!! :D