【Like Japan放送室】帶你潛入新宿尋找真陪酒女郎

今集《Like Japan放送室》帶你潛入真正嘅日式夜總會去睇下陪酒女郎工作嘅地方。我哋嚟到東京嘅歌舞伎町,搵到呢間Tyrano入面兩個人氣好高嘅キャバ嬢MokaShinobu同我地分享佢哋嘅故事添呀!
 
好多人對日本陪酒女郎嘅認識唔深,以為係人哋賣酒又賣身,其實呢個觀念係錯㗎!Shinobu就話最唔鍾意啲客人一開波就問有冇得上床。夜總會係俾客人開心同女仔傾計同飲酒嘅地方,但好多海外客人就誤以為會有進一步嘅服務,但其實係唔會有㗎!Moka都話遇過唔少呢啲客人,但其實陪酒女郎都係人,如果客人亂咁摸或者發脾氣,陪酒女郎都會覺得係客人嘅錯,必要時會搵男店員幫手驅逐淫客離場。
 
問到其實多唔多海外嘅客人嚟幫襯,佢哋就話到多來自亞洲唔同地方嘅人客嘅。但當然唔係個個都識講日文啦!普遍啲客人當中都會至少有一、兩個識日文嘅幫手翻譯,但如果真係唔識嘅時候佢哋都會用英文,甚至翻譯Apps嚟溝通。佢哋仲大讚香港嘅男士非常紳士同溫柔啊!

 

到底做在籍陪酒女郎搵到幾多錢?雖然佢哋冇透露自己嘅收入,但就話同行嘅朋友半個月最高都可以搵到500萬Yen,即係38萬港幣左右。除此之外佢哋當然收到過唔少名貴禮物啦。做咗6年陪酒女郎Shinobu話當年經濟好嘅時候試過有客人送咗架車俾佢。Moka就話曾經收到過一系列嘅Chanel名牌嘢,包括手鏈、手袋同頸鏈等。
 
佢哋兩個依家都係單身嘅,但兩個都曾經同過客人拍拖。佢哋兩個都話做咗陪酒女郎之後對異性睇法唔同之後咗,而Shinobu仲話快啲結婚跟住辭職添啊。有興趣嘅男會不妨去歌舞伎町搵下佢哋喇~

下集佢哋將會教我所有陪酒女郎都會識嘅內幕秘技,同埋親身教我邊度摸得變到唔摸得!記得下星期留意喇!