3分鐘實用(?)常識系列:火山噴發預警級別

九洲著名嘅阿蘇火山於10月8日凌晨突然爆發,發出強烈火光以及大量火山灰,其中有噴出嘅碎石更擊中6、7公里以外嘅住宅。而氣象廳亦將火山噴發嘅警戒級別提升至第三級,呢啲級別到底代表情況有幾嚴重? 而全個機制又分了多少級?
 
 
原來噴發嘅警戒級別共分五級,並適用於日本國內嘅各座火山。
 
 
第一級、平常狀態:
火山處於相對平靜嘅狀態。雖然處於火山地帶唔會受到即時威脅,但係仍須預防各種情況嘅轉變。例如火山口所噴出嘅火山灰等。大部分嘅活火山都處於呢個級別。
 
第二級、火口周邊規制:
於火山口以及週邊地區人士,可能因火山活動而受到直接嘅生命威脅。此時火山口四週嘅地會實施進入限制,如非必要請勿進入火山附近一帶。2015年群馬縣嘅淺間山曾處於呢個級別。
 
第三級、入山規制:
所在地區火山將出現火山活動。除咗火山一帶會有進入限制外,亦會禁止所有登山活動。另外亦會根據情況而準備撤出需特別照顧的人士。箱根山、阿蘇山都分別於2015年試過第三級別。而阿蘇山而家亦正處於呢個級
 
長野縣御嶽山2014年亦試過第三級別 (圖片引用自http://grapee.jp/16998,來源為行山人士投稿影片)
 
阿蘇山現時狀態,紫圈為今次爆發嘅中岳第一火山口(原圖來自日本氣象廳)
 
 
第四級、避難準備:
所在地區火山將出現大規模火山活動(如爆發),並處於危險狀態。火山四周地區極可能出現巨災,需特別照顧人士將獲優先攡離,居民亦要為撒出作好準備。例子有2015年鹿兒島縣嘅櫻島火山。
 
櫻島火山於2015年8月15日提升至第4級,而第4級的警戒維持長達半個月。(原圖來自NHK NEWS)
 
第五級、避離:
所在地區火山將出現極大規模火山活動(如爆發),附近地區可能已受到破壞,處於極危險嘅狀態。火山附近地區會被列為極危險區域,居民必須撤離。2015年口永良部島上嘅新岳火山爆發,氣象廳就將警戒級別直接提升至第五級別。
 
2015年口永良部島爆發,日本政府要緊急派渡輪同直升機將島上137名居民撤離到鄰近嘅屋久島避難。(原圖來自NHK NEWS)
 
 
由於日本各地火山嘅活動頗為頻繁,了解警戒級別所代表嘅資訊,將有助旅程嘅編排。當級別提高嘅時候,除咗避免前往火山一帶外,亦要留意火山附近地區嘅狀況,例如火山灰散播嘅情況、交通安排等。這樣旅程就安全又順暢啦!