【食乜好】5大東京必食正到痺布甸

日本啲布甸點解可以做到咁靚咁誘人,就連便利店嗰啲都好鬼好味,軟綿綿嘅口感、香濃嘅雞蛋香,一入口勁幸福嘅感覺,諗起又好想食啦......如果你同我一樣都勁鍾意食日本嘅布甸,快啲mark低下面呢5間,就算日頭冇時間食都一定要買返酒店慢慢歎,唔試真係一定會後悔!
 
1. TestaRossa Cafe
 
 
呢間Cafe嘅絲綢布甸勁出名,選用咗奶味較濃嘅牛奶同茨城産嘅新鮮雞蛋,加埋來自北海道嘅鮮忌廉,先可以做到個布甸嘅口感好似絲綢咁幼滑。一啖挖到底連埋帶有少少苦味嘅焦糖放入口,甜中帶苦,好味到一啖接一啖咁不停食,唔覺唔覺就好快食哂一樽......
 

舖頭入面嘅布甸已經好香濃好好味,呢個「Premium Silk」味道更濃,因為用咗2倍嘅雲呢拿豆去整,仲只係用蛋黃唔加蛋白,令到個布甸有勁香濃嘅雲呢拿味同雞蛋味!不過呢個布甸屬於期間限定,唔係咁易食到,所以見到有得買就千祈唔好錯過!
 

布甸一共有9種味,除咗原味而家有得食黑芝麻、焦糖、抹茶、草莓、芝士同咖啡,推介一定要食原味,咁先食得出個布甸原本嘅味道。
 

呢度唔係淨係得布甸食,仲有好多唔同款式嘅蛋糕,不過我地緊係為咗個布甸而嚟啦~
 

座位唔太多,食客層竟然唔止得年青人,連上咗年紀嘅人都食過返尋味!
 
テスタロッサカフェ 駒形店 
地址:東京都台東区駒形2-6-1
電話:03-3843-7771
營業時間:11:00~01:00
休息日:星期日及其他日子不定休
官網:www.testarossacafe.net
 
===================
2. 金魚玉珈琲
 
 
呢度嘅布甸用果占瓶上,五顏六色好靚!除咗有比較常見嘅草莓、芝士、焦糖之外,仲有無花果荔枝、櫻花、生姜等等12款味道,口感好細滑,果味好豐富,食咗成樽都冇咩特別膩同濟嘅感覺。
 

呢個係店內最人氣嘅芝麻布甸,同坊間唔同嘅係佢地喺頂加咗好多果仁,口感豐富之餘仲好健康!
 
唔知佢地研發布甸嘅時候係咪以健康為大前題,我發覺好多款都好似好健康咁,好似呢個生姜布甸就有預防感冒嘅功效。食嗰陣有一種好熟悉嘅味道,係啦!有啲似香港嘅姜汁撞奶!
 

一樽樽放哂喺櫃可以慢慢揀,每樽嘅份量都唔少。
 
呢間店同一般甜品店個氣氛好唔同,感覺好懷舊,好沈實樸素。
 
金魚玉珈琲
地址:東京都町田市成瀬1-2-6
電話:042-720-2229
營業時間:星期一、四及五14:00~ 01:00;星期二14:00~19:00;星期六及日12:00~01:00
休息日:星期三
官網:kingyo.rengesha.com
 
===================
3. Colombin
 
 
如果問我布甸同咩係絕配,除咗焦糖,我一定係揀蜂蜜!嗰種天然嘅甜味加埋雞蛋嘅味道,食過一次真係會令人回味。位於原宿嘅Colombin就可以食到咁天然嘅布甸,布甸本身唔太甜,淋咗蜂蜜之後令到成個布甸嘅味道更加完美,好正!
 

呢個布甸唔平㗎,要成¥1,000一個,呢個價真係可以去食到餐飯。不過久唔久食吓啲咁好味嘅野又冇咩所謂嘅~
 

入面裝修有啲似中式酒樓,喺呢種環境食甜品感覺都高級啲。
 
コロンバン 原宿本店
地址:東京都渋谷区神宮前6-31-19
電話:03-3400-3838
營業時間:10:00~20:00
休息日:無
官網:www.colombin.co.jp
 
===================
4. Hekkerun
 
 
呢間「ヘッケルン」係一間出名到鍾意食布甸嘅日本人一定會聽過嘅cafe,喺西新橋開店已經超過40年,店內充滿住昔日氣氛,下奏入嚟慢慢品嚐返個布甸,真係超級寫意。佢地嘅布甸喺味道上唔會玩花巧野,係好經典嘅味道,呢個亦係點解一直受當地人歡迎嘅原因,想食日本布甸嘅真正味道,一定係嚟呢度!
 

以木色為主嘅室內設計唔經唔覺已經超過40年歷史,唔怪得咁有懷舊味道。
 
ヘッケルン
地址:東京都港区西新橋1-20-11 安藤ビル1S
電話:03-3580-5661
營業時間:星期一至五 08:00~19:00;星期六 08:00~17:00
休息日:每月第二個星期六、星期日及公眾假期
 
===================
5. Mvuke
 
 
呢間店雖然唔喺東京都,不過由新宿過去都只係半個鐘倒,好方便。唔好以為呢度啲布甸得個樣,個樽肥嘟嘟好得意,其實佢地出名在於真材實料、用料講究,例如佢地會用2種唔同嘅雲呢拿豆,會用來自那須嘅靚雞蛋,會用來自牧場嘅鮮牛奶,所有食材都咁新鮮,可想而知個布甸都係會好好味!
 
而另一個特別嘅地方,就係佢地有成20種味道可以揀,其中有一半會隨季節改變,款款都咁吸引,真係唔係好識揀,唯有買多幾款返酒店慢慢歎當宵夜~
 
店方好貼心,用埋英文寫明唔同味道,唔識日文都可以好輕鬆咁買到~
 

用蕃茄嚟做布甸真係第一次見,酸酸甜甜,食嘅時候可以加少少岩鹽,咸咸哋,幾得意。
 
佢地有時會有啲特別嘅限定款式,不過喺官網就唔會show出嚟,大家去到舖頭嘅時候可以直接問吓店員。
 
ブーケ URAWA FACTORY
地址:埼玉県さいたま市中央区鈴谷2-744-4
電話:048-799-3806
營業時間:11:00~19:00
休息日:無
官網:www.shop.vuke.jp