【食乜好】銀座激平企住食超熱鬧居酒屋

去親居酒屋都會想搵間坐得舒舒服服,又想有個室可以有返啲私人空間,不過有時有啲野就係唔試唔知,一試先知原來冇過室嘅居酒屋一樣好正,今次推介嘅呢一間仲要係不設座位,個個企哂喺度食,好熱鬧!
 
 
呢間「ドラム缶」位於2樓,見到拉麵店上2樓就啱喇!間野都幾隱蔽,真係可以話係一間隱世居酒屋。
 
 
呢間居酒屋今年6月尾先開,一入到去就見到幾個鐵桶放咗喺中間畀客人企住食,想感受本地人熱鬧氣氛嘅可以揀夜晚時段嚟,附近日本人放工之後都好鍾意嚟呢度飲返杯,傾吓計放鬆吓。
 
因為不設座位、店內空間又唔大,所以大家好容易就打成一片,傾傾吓隨時傾埋過隔離枱。
 
 
呢度好搞笑地有張野話畀大家聽喺度玩要知嘅8個重點,當中有幾點都幾得意,好似叫大家唔好飲得太多、 如果覺得企唔穩就係時候返屋企等等,令人不期然地喺個心度笑一笑。
 
 
除咗氣氛極好,喺短短幾個月內,呢度已經出哂名野食平,小食¥100一碟唔係新鮮事,連酒類一杯都只係¥150起,呢個價真係同出面居酒屋冇得比!
 
 
喺咁多野食入面,最觸目嘅一定係原件上嘅吞拿魚,每日數量限定,大家可以用羹刮啲肉嚟食,想優雅啲可以問店員攞把生果刀,一片片咁切嚟食,不過留意返舊魚係有骨嘅,食嗰時要小心啲。
 
 
食完舊骨記得畀返店員喎,因為佢會幫你將魚骨炸到鬆鬆脆脆,勁香口,最仲要係免費㗎!
 
 
店入面有好多好啱送酒嘅小食,好似呢個吉列火腿,淋埋咖喱汁上去,好簡單,但又好好味!
 
I
 
有野食又點可以唔點返杯酒飲!因為客多嘅關係,有時有啲酒類遲咗少少去就會賣哂,不過唔緊要,有杯生啤就已經好滿足啦~
 
食飽,計一計數,呢餐真係平到笑,點野食嗰陣直情可以唔使點睇價錢都可以放心叫,¥1,000都可以叫到一枱野,勁好用!
 
 
如果覺得夜晚嚟要同一班勁hyper嘅日本人一齊飲酒食野好大壓力,但又想感受下呢度嘅氣氛,大家可以揀下奏嚟,下奏唔單止可以飲酒,仲可以食到咖喱飯,¥300任你裝幾多都得,呢一餐一定夠飽!
 
 
立ち飲み居酒屋 ドラム缶 銀座本店
地址:東京都中央区銀座6-3-5第1高橋ビル2F
電話:03-3573-2455
營業時間:11:00~14:00、16:00~23:00