【食乜好】渋谷超懷舊駄菓子放題

日本嘅居酒屋多到數唔哂,多到好似香港啲便利店咁,總有一間喺左近,不過間間食嘅野都大同小異,成日都想搵啲有特色啲嘅,可以試吓唔同嘅野食之餘最好可以有靚裝影吓相,環境又舒服可以慢慢坐飲杯野放鬆吓。
 
唔好以為咁多要求搵到出年都搵唔到,喺渋谷就有一間,裝修極之懷舊,充滿昭和時代氣氛,最特別係佢呢度特設¥500駄菓子放題,可以任食日本昔日零食,好得意!
 
 
你睇連個門口都做到咁懷舊feel,未入去就要開始影相啦!
 
 
唔同一般嘅居酒屋以個室作為賣點,呢度一眼望哂,私隱度唔高,不過好彩枱與枱之間有適當距離,坐滿哂人都唔會覺得太迫。
 
 
店入面嘅駄菓子bar有啲似香港所餘無幾嘅零食雜貨舖,雖然唔係日本人,都會好神奇地有種好懷念嘅感覺。
 
 
畀咗¥500就可以任食駄菓子2個鐘,不過條件係一定要點杯野飲,有冇酒精都得,話哂呢度都係居酒屋嘛~
 
 
佢地呢個駄菓子放題嘅idea真係幾好,因為飲野實會口痕想搵啲野咬,呢度有成100款咁多,啱哂!
 
 
想食熱食嘅話,呢度都有唔少選擇,除咗炸包,仲有pizza、沙律、韓式煎餅等等,店方更會將零食作為料理嘅元素創作超特別嘅創意料理,例如薯片沙律、薯片韓式煎餅等,好值得挑戰吓!
 
 
呢個給食即係學校嘅飯餐,好多日本人出咗嚟做野想食都食唔返,呢度竟然有得食,有唔少日本人即刻點返個嚟懷緬吓。
 
不過話哂呢度都係居酒屋,要入去食野有少少年齡限制,例如:
①中學生喺冇大人陪同之下唔可以入店
②穿著便服嘅高中生晚上8點前要離開
③穿著校服嘅高中生晚上6點前要離開
④未成年者唔可以點酒精飲品
 
由於店方係有權問你攞身份證明文件睇你夠唔夠年齡,所以最好都係帶埋個passport去。
 
しぶや駄菓子バー
地址:東京都渋谷区宇田川町26-5 2F
電話:03-6416-9820
營業時間:16:00~23:30
休息日:不定休