【食乜好】池袋4大人氣爆燈必試甜品

去得日本玩,一日一定唔止食三餐,計埋甜品宵夜5餐已經算少,不過唔係個個都食到咁多野,嘅然個胃嘅quota有限,我地當然唔可以浪費空間,要食就食好味嘅!今次為大家推介4個可以喺池袋食到嘅甜品,等大家行街行到攰嘅時候知道有個地方可以坐吓食吓甜品。
 
 
 
1. 銅鑼燒@Suzumeya
 
 
係咪想話「唓~ 銅鑼燒香港都食到啦!」?話俾大家知,呢度嘅銅鑼燒喺你一拎上手嗰吓就會覺得好唔同,拎上手好重手,一搣開,即刻見到粒粒紅豆都好大粒!唔止,細心啲留意佢地銅鑼燒個外皮係有2層,口感比一般食到嗰啲豐富好多!
 
間舖頭好細,基本上啲人都係買走食嘅,不過店入面都有一張長椅,想係埋先走都ok。除咗銅鑼燒,仲有其他幾款菓子,不過當然都係銅鑼燒最受歡迎啦!
 
佢地都有入咗盒嘅10件裝,不過因為無添加防腐劑,嚐味期限翌日就係,所以大家都係唔使諗住買嚟做手信。
 
すずめや
地址:東京都豊島区南池袋2-18-5
電話:03-5391-0196
營業時間:10:00~15:00 (售罄就收舖,想買早啲到)
休息日:星期日
 
===============
2. 鮮忌廉生果刨冰@HACHIKU
 
 
大家已經食過巨形刨冰唔出奇,但呢個外層塗滿咗忌廉、入面裝滿水果嘅刨冰你一定未試過!佢最特別之處係選用嘅生果唔係一般常見嘅芒果、菠蘿嗰啲,而係番薯、南瓜、牛油瓜、朱古力等等,完全同以前食過嘅刨冰嘅感覺好唔一樣。
 
佢地嘅刨冰有大同細分,細嘅加¥100將刨冰底變成日光天然冰。
 
店入面有個手寫Menu,內容會隨季節而變動,所以下次再嚟可能又可以試到唔同嘅野~
 
呢個密瓜刨冰竟然用咗半個密瓜當兜咁上,食到尾聲可以大啖大啖咁挖啲果肉嚟食,好正!不過呢個唔係成日有同埋係數量限定,要食就趁早~
 
坐位唔係好多,但有2個圓桶疑似俾人企喺度食。
 
識日文嘅去之前記住去官網望吓先,老闆有時見到靚食材就會入貨,推出一啲喺餐牌上面冇嘅限定款式,機會真係可遇不可求!
 
HACHIKU
地址:東京都豊島区西池袋3-32-6 藤栄ビル 1F
營業時間:13:00~20:00 (售罄就收舖,想食早啲到)
休息日:不定休
 
===============
3. 勁足料超大粒果肉蘋果批@mammies an sourire
 
 
見唔見到!個蘋果批入面係塞滿哂好大粒嘅蘋果㗎!呢間舖原意係想整啲小朋友都適合食嘅蘋果批,所以呢度嘅味道會相對地較平實,一啖咬落去就食得出蘋果嘅香甜味!值得一讚再讚嘅係,入面嘅蘋果焗完出嚟仲keep到好juicy,好味!
 
唔止得蘋果批,店入面仲有藍莓批、檸檬批、車厘子批、香蕉批等,款款啲餡都係塞到滿哂。
 
呢度嘅蘋果批真係有料到㗎,係關東手信榜嘅第一位!
 
マミーズ・アン・スリール 東武池袋店
地址:東京都豊島区西池袋1-1-25 東武百貨店池袋店 B1F
電話:03-3981-2211
營業時間:10:00~20:00
休息日:以東武百貨店池袋店為準
 
===============
4. 宇治抹茶刨冰@三原堂
 
食宇治金時唔一定要走到去京都咁遠嘅,呢間三原堂係昭和初期已經存在嘅和菓子老舖,一樓可以買和菓子,二樓就係甜品舖,可以食到好多傳統嘅日式甜品,而當中最人氣嘅就係呢款宇治抹茶刨冰喇!
 
刨冰質感好似雪咁幼細,上面灑滿冇甜味嘅抹茶粉,再上面就放咗甜甜吔嘅紅豆蓉,一羹將3樣野放哂入口,抹茶嘅苦味中和咗紅豆嘅甜味,啱啱好!
 
1樓售賣嘅係較傳統嘅日式和菓子,買返去做手信都唔錯。
 
2樓
 
三原堂
地址:東京都豊島区西池袋1-20-4
電話:03-3971-2070
營業時間:11:30~17:30
休息日:星期四